女人戲當道！電影《29+1》、《春嬌救志明》、劇集《全職沒女》，甚至啱啱播完嘅無綫4K劇《不懂撒嬌的女人》，全部都係以時下女人面對愛情同事業嘅心態做主題，尤其「撒嬌女人」呢個議題近呢幾年真係講極都唔完！好多人大讚無綫今次搵宣萱返嚟拍《不》劇搵得好，話出名係「原則王」嘅佢，飾演魔鬼上司Mall姐入型入格！煲得劇，好自然連佢嘅感情生活都judge埋，啲師奶猛話佢依家46歲未嫁得出，係衰太強勢太講原則，男人怕怕，即係不懂撒嬌喎！我Nuts哥覺得宣萱唔係不懂撒嬌，而係一個「不懂轉彎的女人」！
唔好以為宣萱份人講原則揸住條底線，吓吓都stand behind the yellow line就好蝕底。今時今日，宣萱疊水揸三千萬樓，住大屋玩洋狗，收埋幾多錢你都唔知寧缺莫濫，佢都話只求搵個心靈伴侶，唔係因為佢有三千萬磚頭好巴閉唔志在，而係對自己有信心，清楚知道自己要啲乜。好多女仔成日換畫，漫無目的去搵男友，心態好似搵工一樣做住先，咁就出事喇！就算唔曉「轉彎」吓吓講原則，睇落好似錯過好多嘢，但起碼心甘命抵，對得住自己，無謂將來浪費青春做怨婦怨天怨地，後悔到要喊三聲
拒息影 唔嫁有錢人
喺英國讀名牌大學出身嘅宣萱，論學歷、家底、樣貌完全唔輸蝕，佢冇諗過憑呢啲優厚條件就博做豪門少奶奶。唔少女仔都想另一半package 100分，當年宣萱同富二代榮文瀚拍拖，半隻腳踏咗入豪門，條件係只要佢放棄事業唔拍劇，就可以做全職闊太。呢個簡直唔係條件咁簡單，直頭係唔少女仔嘅夢想啦，唔使撈喎！但係宣萱耍手say no，話一直冇諗過一定要嫁有錢佬，二來完全唔想嫁咗就冇自己事業，簡單啲講，唔想靠晒男人而冇咗自己！完全冇彎轉，最終當然分手收場
因為「不懂轉彎」，成個金礦宣萱一腳踢走！唔好以為佢又硬又直，百分百係大女人！你估都估唔到，佢「不懂轉彎」嘅程度係有幾驚人！宣萱自爆之前有個男友A，A嘅前度女友嚟香港就要求喺A屋企住，宣萱真係好信任男友，本住「不要問只要信」嘅精神，不單止唔介意前度登堂入室同男友日夜相對，仲親自去機場接送，幫人搬埋行李，出錢出汗又出力，最後咪出事囉！發現A同前度女友暗渡陳倉，自己親手製造機會畀佢哋乾柴烈火！
如果曉「轉彎」，識得諗計對付個女人，都唔使搞成咁啩！發現有小三唔只得一次！自稱從來唔check男友手機同電腦嘅宣萱，有次神推鬼擁咁啱男友沖涼，佢諗住用部電腦上吓網，點知一按就見到男友同前度女友嘅私密對話。最爆嘅一次，係聽聞佢突然殺上男友屋企畀驚喜，點知變驚嚇，發現男友匿喺房同另一個女人進行情慾對話，仲講到㷫合合，宣萱偷聽咗半粒鐘都唔知！
有信心 寧缺莫濫
明顯宣萱直到一個點，對住喜歡嘅男人不要問只要信，聽晒對方話，全無防備同戒心，搞到男友去偷食都後知後覺。只係拍拖猶如撞鬼一樣都要講緣分，試過幾段戀情出現第三者、甚至男友食回頭草溝番前度！話時話都幾hurt，經歷多次唔愉快嘅拍拖經驗，宣萱完全唔憂嫁， 講明睇清楚先「落注」都好正常！撒嬌女人最好命呢句說話，我唔敢話係百分百唔啱，撒嬌始終係女人最強最原始嘅武器，如果宣萱懂得掌握timing同力度去撒嬌，自然會化解愛情路危機。
|
鍾意就快D Share啦！
|
|
|