今年69歲嘅羅康瑞最近為家族爭產案好頭痛！去年底，97歲嘅羅老太、已故創辦人羅鷹石遺孀羅杜莉君突然入稟法院要求撤換匯豐為其家族信託管理人，官司已排期至下周二(13日)進行內庭聆訊。羅康瑞當年靠爸爸打本10萬元設瑞安集團，如今已是多間上市公司主席，包括瑞安房地產及瑞安建業，市值共約147億元。自己打天下，有指喺家族官司案中，羅康瑞係最中立一個，早前開腔力撐三哥、家族信託權益人兼鷹君主席羅嘉瑞應得到「最大份」，自己得細份都冇問題，並透露鷹君集團現資產淨值超過600億，羅康瑞搖頭嘆息話﹕「可能係肥田有人爭啦。」(相關新聞﹕http://bit.ly/2soFMpP)羅康瑞稱至今仍未同媽媽取得聯絡，雖然家事好煩，但噚日仍偷得浮生半日閒，同太太朱玲玲去銅鑼灣行街，兩夫妻全程表現恩愛，真係羨煞旁人。噚日下午約四點幾，羅康瑞同朱玲玲現身時代廣場專賣運動裝嘅樓層，佢哋入到舖內，羅康瑞個樣好憂愁，顯得有啲攰，坐埋一邊等老婆幫佢揀衫褲。見朱玲玲金精火眼，專攻男裝黑色運動褲，見到合適就攞埋去俾老公拼上身，但連試咗三間都空手而回。之後羅康瑞同朱玲玲就去咗一間露天cafe嘆個自助式下午茶，佢哋沿途都拖住手，有傾有講，非常之sweet。雖然羅康瑞個樣有啲疲倦，行動較緩慢，但佢仍能展現紳士風度，幫老婆出去買同攞嘢食，佢哋兩個人share一件蛋糕，真係好細食，又唔浪費食物。約15分鐘後，羅康瑞同朱玲玲再入去日本休閒服品牌，今次終於搵到啱心水嘅恤衫同西褲，買咗一大袋，付錢後就由司機接載離開。
| 羅康瑞同老婆朱玲玲行街，全程個樣有啲憂愁，唔知係咪諗緊家事？(攝影﹕畢紹基) | | |
| | | |
| | | |
| |
|
鍾意就快D Share啦！
|
|
|