「Ball后」薛芷倫（Fanny）接受奇妙電視節目的訪問，與主持人兼公關好友鄭紹康大談患病後被昔日好友疏遠的經歷。Fanny稱離婚時，身邊三分二好友離她遠去，到患癌病後，連剩下的朋友也沒有，心情十分難受，她說﹕「有報道話我入醫院，講到好誇張，但冇人打嚟問候我。我需要嘅關心係冇，但所有關心都係八卦，想八卦我嘅嘢，係幾難受。」她更大爆一位昔日的金蘭姐妹L女士在派對上對她公然羞辱：「佢係第一個知道我離婚，但佢亦係第一個同我脫離朋友關係嘅人，之後幾年大家冇見，跟住我又有病，有次我啱啱病好，出返嚟Ball場撞到佢，佢見到我，佢冇講嘢，只係行過嚟不停捽我塊面，大家係化晒妝、好有儀態，佢專登做呢啲嘢，係差在未摷亂我嘅頭髮啫，佢跟住行開咗，我唔知佢咩心態，我亦唔想理，因為如果呢啲人可以喺我最困難、最需要朋友嘅時候離開我，點解我要Care佢見番我對做啲咩行為呢，其實問題喺佢嗰度。」
解釋面容變化原因
Fanny在訪問中強調沒有整容，她解釋外貌一直未穩定，因為治療期間醫生注射了大量類固醇在她體內，整個人肥腫難分，完成電療後，還需要五年食藥的抗癌過程。鄭紹康提到有位K太太指：「Fanny話自己冇整容，係咁不如整埋佢啦？」Fanny無奈說：「唔整都畀人講話整吖嘛，唔抵吖嘛，但我唔係一個相信整容嘅人。」Fanny稱會被瘋傳整容一事全因為一張照片：「我出席咗一個活動，影咗張相，因為係高炒，影到塊面特別尖，因為我係康復期間，所以個面形係怪怪哋，有啲部位係腫，有啲係骨感啲，生過病嘅人啲骨係會縮，我個下巴係尖咗，而我個面係未消腫，張相畀朋友Post咗上Facebook，開始被不停轉發，甚至美國有個節目嘅監製嚟邀請我，叫我上去佢個節目講吓整容，我話我真係冇整，但佢哋唔信，原來當時有美容院或整容公司攞咗我張相去做一個反面教材，話我削咗個下巴，但失敗咗，我嗰時人都癲，撻着咗我嘅火，我話可以點停止呢件事呢？」
每日收一萬負評
此外，Fanny指出其微博每日也會收到幾千至一萬的負評，留言亦十分難聽，例如：「你幾醜樣吖」、「你唔好出嚟嚇人」、「你睇吓你自己咁嘅樣，你死咗佢好過啦」、「你照鏡會唔會嚇親自己㗎？」、「你有冇男朋友瞓喺隔籬嚇親佢？」、「你仔女驚唔驚你？」、「你覺唔覺得你似怪物？」、「你連鬼都不如。」但後來Fanny發現留言只是不斷重覆相同的句子，是打手所為，她說：「呢個人或者係同我有瓜葛或者係好唔喜歡我，或者見我死唔去囉，我唔知呀，我唔想去諗點解人哋要咁樣做。」最後Fanny以「謠言，止於智者，謠言，散於智障。」作為總括，她希望大家待人處事，說話言也要顧及別人感受，不要做出損人不利己的事。
|
鍾意就快D Share啦！
|
|
|