探熱針
對住男友變貼地 G.E.M.俾二手煙兜面噴
由太空回歸地球發展的 G.E.M.（鄧紫棋），早前宣布九月於紅館舉行兩場演唱會，最貴的 VIP票價高達$1,980，完全當正自己是國際級歌手。
距離演唱會尚有三個月，早前國際漿孖住愈愛愈高調的男友 Mark Ngai於銅鑼灣 citysuper上糧，預備玩煮飯仔，對外企硬國際級規格待遇，極度大牌的 G.E.M.，對住男友就自動轉 channel，紆尊降貴變小鳥依人 mode，主動幫手拎遮，兼兜口兜面食二手煙都冇怨言，何謂愛的表現，國際漿真人示範！
心形眼
戴住 cap帽同口罩的 G.E.M.同男友 Mark（即係 JW的前度）在銅鑼灣時代廣場出現，兩人從連卡佛的後門等待七人車，由於正值放工時間，人來人往，兩人刻意保持距離，怕被途人發現，但國際漿周不時忍唔住心形眼偷望男友。
過了一陣子都不見七人車的蹤影，煙癮起的 Mark自動彈開，躲到旁邊的凹位準備「打邊爐」，國際漿貼心地主動提出幫男友拎遮，然後便九秒九彈開避二手煙。因為坐駕等極都未見蹤影，扯住煙的 Mark主動撩女友吹水， G.E.M.忍唔住愈行愈埋，一啖駁一啖，大口扯的 Mark，兜口兜面將二手煙噴向女友， G.E.M.不單止照單全收無詐型，還放下戒心，主動捉實 Mark卿卿我我，眼見男友等得不耐煩，還自動波打俾司機追問，照顧周到。
「佢做嘢同拍拖完全兩個人，以前細個仲會有小姐脾氣，而家知道自己要搵個人肯同佢拍拖唔容易，連啲小姐脾氣都收埋，今次佢好小鳥依人，成日都主動 take care阿 Mark，但係拍得耐會唔會現真性情就唔知喇！」 G.E.M.的身邊人透露。
等足廿分鐘都未見車影， Mark等到扁晒嘴，國際漿當街摸男友臉龐，搏對方一笑，呢一招果然 work，男友當場甜笑，火氣全消，夾啱時間七人車駛到，二人極速跳車離開。
多次想自殺
香港站演唱會尚有三個月先開鑼，但 G.E.M.已積極蒲頭為演唱會宣傳。日前 G.E.M.孖住網絡紅人波子試玩近期大熱的測謊機，其間主持人問 G.E.M.有冇諗過自殺，當事人借機真情剖白，指過去幾年負評如潮，不只一次萌生這個念頭，「我好多次（想自殺）添呀……我冇真係去做，大家要點樣先至可以去相信一個人呢？然後我就喺度諗，係咪要我寫晒遺書，講俾大家聽先至會信我呢？」 G.E.M.說。
G.E.M.坦言信仰令自己尋回快樂，但與前度的恩怨似乎發揮不了緩和的作用，早前林宥嘉來港開演唱會，即使做老襯在即，但傳媒難免重提他與 G.E.M.的一段情，問到兩人是否再見亦是朋友，林宥嘉刻意避談，估你唔到兩人事隔多時依然有牙齒印！
離地 G.E.M.
自 14年參加湖南衞視《我是歌手 2》火速爆紅後，鄧紫棋（ G.E.M.）經常被人鬧囂張、臭檔兼耍大牌，恃住人紅，不時爆出離地行為。
硬闖上台
今年二月， Dragon and Music Festival，請來美國組合 Black Eyed Peas壓軸出場，睇騷的 G.E.M.卻未經主辦單位同意下，突然現身台邊，騎劫舞台兼搶咪與 Black Eyed Peas合唱，有傳工作人員曾阻止出場兼拒絕遞咪，引起觀眾連環噓爆，更有人大叫「落台」，認真尷尬。
撰文：娛樂組
攝影、攝錄：余一駱
|
鍾意就快D Share啦！
|
|
|