現年41歲的黃宇詩，賣bra之前，其實曾挾黃霑女兒之名入無綫，而且日子不短。曾於九龍聖德肋撒英文學校就讀的黃宇詩，13歲隨母華娃移居加國，00年回流香港，由汪明荃引薦到大陸拍攝劇集《鏡花緣傳奇》，套劇等足4年先至喺亞視播出，所以甫出道的她，有一陣「亞視除」。01年，黃宇詩拍完電影《等候董建華發落》演母親角色，之後又苦無機會，當時佢就諗起父親認識無綫監製陳家倫，更主動相約，希望對方介紹佢入大台。陳家倫就將佢介紹俾藝員部陳灌明，自此便加入TVB。可惜一直都係做配角。黃宇詩有份參演嘅劇集，好似係劇集《再生緣》已較為人熟悉，其餘時間主力都係主持工作，包括頒獎禮同《都市閒情》。未嫁的黃宇詩，主持了《都市閒情》8年，又做過《全線大搜查》，但唔係筍job，亦冇可能爆騷，因為一個禮拜開得一兩日工，一個月賺多幾千蚊。黃宇詩曾表示，不是沒有試過拍監製門，但冇用。假假地都係加拿大卑詩大學畢業，主修亞洲研究，副修戲劇，又是名人之後，但在那個moment，明顯無用武之地。大家嗌佢，都仲係「霑叔個女」、「黃霑個女」。李家鼎就曾讚黃宇詩：「黃霑個女（黃宇詩）騎得好好㗎，有姿勢、有實際。」受訪時都忍住喊：「喺呢行咁耐，啲人仲係嗌我做霑叔個女。」做黃霑個女唔一定有著數，02年黃宇詩就「成功見報」，就係因為佢俾當年無綫首席化妝師陳文輝公開狂鬧。嗰陣黃宇詩做緊《全線大搜查》主持，一次佢自己落手化妝，企喺佢側邊嘅陳文輝突然嘈到拆天：「你做乜自己化妝，化到一撻撻，你睇吓自己似咩呀……我依家同你講緊嘢，你仲唔企起身！」嚇到黃宇詩即時成個彈起身。當時鬧足五分鐘嘅輝哥意猶未盡，仲即時問黃宇詩個藝員編號，然後打畀藝員科高層投訴。當知道黃宇詩係黃霑嗰女，輝哥更嬲，加多幾錢肉緊繼續鬧：「黃霑個女又點呀！黃霑咁有修養，但係生個女咁冇家教……。」事後黃宇詩被問及此事，佢只能夠話：「其實係小事」，又將罪攬晒上身，又引述父親格言:「做新人就係要俾人鬧先會有進步。」又指輝哥之後見到佢都有搭膊頭話係誤會……
|
鍾意就快D Share啦！
|
|
|