二千年，李澤楷（右一）以「科技小子」形象，吞併老牌電訊公司香港電訊，左一是當時大東電報局行政總裁 Graham Wallace，中間是當時香港電訊行政總裁張永霖。
中環人語
李澤楷身家「幾乎」多過老豆
股市靠着幾隻股票有秩序地發圍，投資銀行家喺中環坐低都離不開講住隻「股王」——騰訊（ 700），有口痕友話：「當年 Richard Li如果唔係咁早賣走騰訊，家陣身家多過佢老豆！」
此話何來？追溯至一九九九年，騰訊創辦人馬化騰僅廿八歲，即創立 QQ不到兩年之時，騰訊面臨財困，那時李澤楷乘科網股氣勢，正部署收購香港電訊，並且睇中 QQ之潛力，灑胡椒粉咁斥資$860萬入股騰訊兩成股權，只是李澤楷蛇吞象買入香港電訊後自己亦債台高築，急於出售非核心的業務還債，遂於二○○一年，把兩成騰訊股份以$9,800萬賣咗俾南非傳媒王國 Naspers旗下的 MIH，雖然電盈賺咗近億，但又有誰料到，如李澤楷揸到依家，此金蛋以今天騰訊每股$316計，市值六千億元，身家仲唔係多過佢老豆？（註：按福布斯 2017年排名，李嘉誠身家為$2,489億），兩個字——「飲恨！」
相反，南非佬控制的 Naspers繼續加碼，現時成為騰訊大股東，佔 33.25%，不過互聯網業務涉及國家安全， Naspers的大股東是南非政府的主權基金 Public Investment Corporation of South Africa），○七年，工商銀行以五十五億美元入股非洲最大嘅銀行—— Standard Bank Group兩成股權，透過「鍊」住間非洲最大嘅銀行，多少對 Naspers發揮到影響力，阿爺就有安全感啦。
甘比手袋外交
前澳門特首何厚鏵去年一個月內喪母繼而喪妻，認真運滯，近日其生意拍檔吳立勝，因賄賂兩名聯合國官員，被美國當局判罪成，或面臨最高六十五年監禁，已年屆六十九歲的吳立勝，不知有冇咁長命坐監？聽講何厚鏵都「病」咗，壓力大也。一代梟雄大劉當日激心地鬧大鼻，還是劉太——甘比看破世情，以和為貴，幫襯何厚鏵個女何芓諄買手袋，買吓靚衫手袋，實行以女人仔手法搞「 shopping務實外交」。
中環寸嘴 𡃁模收鮑魚撐富聲
工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。
行到去灣仔食晏，見到新開張嘅「龍門棧」招牌都唔去住，都係撐吓籮友（順德話即老友）間富聲魚翅海鮮酒家，雖然我冇掂過佢 pat pat。老闆鮑魚大王盧德光，叫人入去富聲幫襯仲有誠意過叫人入順德聯誼會，真係抵佢發！
須知道鮑魚盧個仔，堪稱鮑魚王子，仲識得將鮑魚發揮到淋漓盡致。話說幾年前，我撞去九龍國福樓食飯，嗰陣剛開張甚有氣派，見間 VIP房好矚目，有人出出入入，唔知乜嘢大人物坐喺入面，以我敏銳嘅觸覺就知有料到，原來係鮑魚王子請𡃁模食飯，仲即席送上鮑魚作見面禮，呢啲咪叫又食又拎囉；鮑魚王子喺人哋架步送鮑魚，好似賭十三張咁，有三啤格局；即係咁講，喺米蘭站買 Hermés同你喺專門店買，邊度有 feel啲自己諗吓啦。此乃鮑魚王子唔知度咗幾耐嘅「前傳」。
及後，鮑魚王子被狗仔隊拍到，同班𡃁模在自己勢力範圍下的富聲魚翅酒家晚飯，扯啲𡃁模捧自己場，廣告效益真係影響深遠，十年後還記得，我都要寫個「服」字。
歐智華億半肥雞餐到口邊
獅子銀行 CEO歐智華時間無多，即將出任滙控主席的 Mark Tucker已四出覓新 CEO人選，所以歐智華點會唔舉腳支持回購行動，從而刺激股價上升，谷吓自己隻肥雞。佢老哥雖然呢兩年被減薪，但獎勵股份有成兩百萬股，如果可以安安穩穩坐到二○一八年退休後就賣得，歐智華呢筆肥雞餐都好和味，以現股價計市值$1.57億，獅子銀行真係高招，等你 CEO臨尾都搏晒老命谷起股價。
|
鍾意就快D Share啦！
|
|
|