當日蕭正楠落鋪巡視業務，之後索性著住圍裙埋機接 order。
探熱針
儲彈藥娶黃翠如 蕭正楠開行 Turbo 落場賣漢堡
一套《超時空男臣》贏 like的蕭正楠，近日傳出同拍拖三年的黃翠如，八月秘密外遊結婚。娶「聯旺集團」主席個女，要儲彈藥的蕭正楠開行 Turbo，拍劇生意兩瓣兼。
去年開漢堡店，今年六月再開分店，為催谷生意，一招「男臣」駕到，蕭正楠落鋪賣包吸客，促銷！
向未來外父交代
今年四十歲的蕭正楠，同黃翠如拍拖三年，早有成家立室念頭。近日傳出二人於年初向公司攞定假，計劃八月在外地低調註冊結婚，明年補擺婚宴。傳聞仲講到好兄弟曹永廉同甩拖唐詩詠，做伴郎伴娘。
雖然兩個當事人都否認八月結婚，但蕭正楠曾經講過：「我會俾佢一個難忘嘅婚禮！」兼夾要向身家億億聲的未來外父交代，所以上到男一，蕭正楠仍然要諗計發圍。
生意發大搞
去年孖表弟在牛頭角開漢堡包店「 Burger B」，翠如 BB亦「夫唱婦隨」在 ig放漢堡包相宣傳。見第一間店有錢賺，想做漢堡大王的蕭正楠發大搞，今年六月，在藍田開第二間分店。食住在人氣劇《超時空男臣》的號召力谷吓生意，上週他出席完劇集宣傳活動，直踩落藍田鋪做生招牌，貼地吸客。
食客 O晒嘴
蕭正楠走入鋪頭，同員工傾咗兩句，就掛件圍裙上身做收銀。有食客以為係「幻覺」嚇一跳，亦有部分見「男臣」駕到，始知自己幫襯緊蕭正楠而 O晒嘴。經過的途人更以為大台拍整蠱節目，只敢離遠舉手機偷拍「大將軍」。直至他揮晒手，開到聲拉客：「過嚟買個包食吓！」班粉絲得悉蕭正楠堅賣包唔係玩嘢，即撲向收銀幫襯。蕭正南接 order收錢仲送埋餐，親民加殷勤，獲星級招待嘅藍田街坊俾佢冧到暈。
落場賣包，蕭正楠對盤生意好瞓身。「拍住表弟開，佢管廚房，我就一得閒返嚟幫手做樓面嘢。呢個分店六月先開，之前係試驗性質，見生意好，咪喺商場正式開一間，今年打算再開多間。」蕭正楠說。
鴻圖大展，為要儲老婆本娶有米黃翠如！蕭正楠只一句：「結婚傳聞唔好信呀！」
捱 17年 做老闆發圍
歌唱比賽奪獎入行
蕭正楠 01年，參加《太陽計劃之優質樂壇接班人》歌唱比賽，奪「冠軍」和「超人氣潛質獎」、參加《全國百事新星大賽》奪得「魅力新星大獎」。在兩個大型歌唱比賽嶄露頭角，因而被唱片公司高層李進賞識， 02年簽約「大國文化」。
事業愛情穩步上揚
12年，發展平平的蕭正楠與何傲芝拍拖，當時一直有指何父嫌他不夠富貴，兩人一直保持地下情。至 14年他因拍《師奶 Madam》，與黃翠如撻着，兩人拍拖以來，蕭正楠事業更上一層樓，去年更從商做老闆。
明星愛搞食肆
圈中不少明星愛搞食肆，更搞到有聲有色，開埋分店。先有林子善開「龍鳳冰室」，林夏薇投資千萬開點心火鍋店，後有唐文龍開居酒屋及楊秀惠搞日式刨冰店。近日就連麥包都開懷舊茶餐廳，看來明星對食，真是情有獨鍾。
撰文、攝影、攝錄：娛樂組
|
鍾意就快D Share啦！
|
|
|