張栢芝同謝霆鋒2011年8月中公布離婚，三年後，謝霆鋒同舊愛王菲復合，當年栢芝被媒體問到「鋒菲」復合，佢都大方送上祝福。不過，多年嚟不時有消息指栢芝放唔低霆鋒，對「鋒菲」復合耿耿於懷！而尋日栢芝喺ig上載短片，五次提到8月8日囝囝開學，自己就會開工，蘋果日報之網上即時新聞以8月8日為王菲生日，借此指栢芝「別有用心」多次喺ig短片不斷提8月8日等等嘅說法......對於多年來有關佢「未忘情」嘅傳聞，張栢芝接受東網獨家專訪，力斥該報道不實之餘，並會剖白自己嘅內心世界！
記：記者 張：張栢芝
記：你喺IG放短片，提到8月8日兒子返學便會開工，但被該報道解讀成你未能放下舊愛，你點睇？
張笑說：仲有話我提咗五次（8月8日）嘛，真係好好笑，其實我唔係嬲亦冇唔開心，只係覺得今次呢個報道唔公平、係人身攻擊、歪曲事實同埋不受尊重，絕對同真相不符合，所以我一定會採取法律行動，因為咁樣係誤導大家，傷害咗我，無需要保留，我出道十八年，好多無中生有嘅負面新聞，我都唔去回應，死貓吞到就吞，但今次隻貓太肥吞唔落！平時我都好少理啲負面報道，呢一次，好多關心我嘅朋友都戥我氣憤，所以必須講清楚。
記：其實你點睇「鋒菲戀」？
張：佢哋當年第一日公布重新喺埋一齊，我已經送上無限祝福，唔會一、兩年之後無啦啦走去有怨恨放唔低，行李就放唔低，哈哈！可能有啲媒體喜歡炒作，當呢幾年我講嘅嘢係冇聽過，不斷重覆又重覆咁炒作，寫我未放低，但我由頭到尾都係祝福佢哋。
記：有冇恨王菲？
張：第一，我對男方（謝霆鋒）冇愛；第二，我對女方（指王菲）完全冇恨，有啲fans畀某啲誤導話心痛我放唔低，我同佢哋講番，我都冇放唔低，我依家好快樂，活得好精彩！
記：睇到謝霆鋒同王菲一啲恩愛照片，真係一啲感覺都無？
張：都冇愛冇關係，依家除咗囝囝嘅嘢，我哋係「零聯絡」，連見面都冇見過，點解會有感覺？我只會向佢哋送上無限祝福，其他感覺完全冇。
記：你有冇恨謝霆鋒？
張：都冇感覺何來恨？你會唔會恨坐你隔籬飲茶嘅人？恨嘅都可能係嗰籠叉燒包或者件燒賣。
|
鍾意就快D Share啦！
|
|
|