掃呢頁CODE去手機

2017年8月3日 星期四

客串教小朋友做主播 珠珠呻全職媽媽好攰 [壹週刊 - 1430] __,M1,

成班小朋友上堂勁專心,足以證明珠珠吸引力有幾大。八卦陣客串教小朋友做主播 珠珠呻全職媽媽好攰好耐無喺電視機見珠珠(趙海珠)做主播報新聞喇!早幾日,珠珠 ...


成班小朋友上堂勁專心,足以證明珠珠吸引力有幾大。

八卦陣

客串教小朋友做主播 珠珠呻全職媽媽好攰

好耐無喺電視機見珠珠(趙海珠)做主播報新聞喇!早幾日,珠珠就為一個兒童暑期課程擔任客席講師,教授小朋友點樣做新聞主播,《壹》仔都唔執輸跟埋去學吓嘢。果然做咗媽媽係唔同啲,珠珠全堂都超有耐性,同小朋友講故事教發音咬字,成班小朋友都俾佢嘅魅力吸引,勁專心圍埋聽故事!

趙海珠呻做全職媽媽攰到爆,佢話趁仲後生,遲吓都會出番嚟做嘢。

落堂後,《壹》仔同珠珠傾咗幾句,佢話自己其實好緊張,不過好彩喺屋企都有同小朋友相處嘅經驗。珠珠依家已經貴為一仔一女嘅「阿珠媽」,湊夠一個「好」字超幸福。不過佢都話做全職媽媽真係好攰,每日都要陪小朋友放電,搞到自己都無晒電,認真慘慘豬。

好多人都覺得珠珠嘅人生一帆風順,入大台做主播報新聞迷到萬千市民,轉行做投資又被封「輪后」,之後仲嫁到好老公,簡直係人生勝利組,羨慕死唔少人。但係珠珠就話佢都有過低潮,只係無同大家講過咁解。雖然佢話自己唔相信起跑線,不過依家都俾囝囝讀國際學校,為送佢去外國讀書鋪路,都咪話唔用心良苦。

佢又透露,遲啲會出番嚟做嘢,始終三十幾歲都仲後生,想捉緊機會睇吓自己仲可唔可以做啲乜咁話喎。會做乜?佢話未講得住。如果再做主播,班網民實開心死。

自由黨狀元成政助人選 想洗尖子底

特首林鄭月娥公布副局長同政治助理人選前,名單已經流傳,其中一位值得留意嘅係運房局政助人選、自由黨青年團主席符傳富( Mark),皆因佢係○五年會考 8A狀元,論成績最好一定係佢。

港大精算系畢業嘅 Mark被視為黨內「明日之星」,佢曾經透露人生路都唔係咁順暢,中學入男拔萃時被編入最差嗰班,俾班主任話佢係籮底橙。對於係咪加入熱廚房,佢星期一回覆話政府好快公布,叫大家耐心等多陣,聽落九成九成事。

四年前, Mark參選京士柏選區補選,因為宣傳單張標榜自己係尖子,被質疑「同做區議員有乜關係?」事實上又係,林鄭會考都係得 3A5B1D, 689會考仲失埋手,升唔到母校英皇書院讀中六。

Mark同《壹》仔講,其實做狀元係好耐之前嘅事,唔希望大家淨係因為咁記得佢。當年佢啱啱大學畢業,係政治素人,近年喺黨內或者運輸業界積極工作,關注的士同小巴等議題,他強調:「去到今日,我覺得個情況係會好大唔同囉。」狀元口啓咁堅定,希望佢入到政府唔會變番籮底橙啦。

符傳富(左)承認參與京士柏補選時仲係素人一個,但強調今時唔同往日。(符傳富 Facebook圖片)

符傳富(右二)去年成為自由黨青年團主席,今年三月仲同當時特首候選人曾俊華(右三)對談約半小時。(《蘋果日報》圖片)

菲律賓監獄出書成網紅 絕望港男上訴失敗

本刊今年初專訪喺菲律賓坐監嘅港男鄧龍威,報導一出,佢嘅 Facebook專頁多咗一倍 Like,仲有書商搵佢出書。本處男作喺書展賣得唔錯,要加印應市,鄧龍威話目前賣咗五千本,好多謝《壹》仔,事關六年前《壹》仔喺菲律賓監獄影過佢,今次免費借相俾佢出書。

可能你會覺得奇怪,點解鄧龍威坐緊監都可以用手機,菲律賓監獄無奇不有,你睇佢本書就會大開眼界,租借手機係監獄內嘅生意,佢問囚友借手機嚟上網,就係想香港人知道佢嘅近況。

鄧龍威十七年前喺馬尼拉旅遊期間,被控藏毒,當局判佢終身監禁,扣除寬減最少要坐三十二年。佢話當初被屈打成招,從來冇販運冰毒,初審敗訴後堅持上訴,可惜上星期法庭判佢上訴失敗,維持原判,佢話一定上訴到底,還佢公道,但若果佢決定喺菲律賓上訴,咁佢就未可以遣返香港服刑。

堅持都有成果嘅,鄧龍威喺 Facebook愈來愈多粉絲,仲有支持者自發搞街站,發起「香港人救香港人」行動,收集市民簽名,希望公眾關心佢嘅情況。

二○○○年,港人鄧龍威(右)同張泰安(左)前往菲律賓,點知換來被控販毒,重判終身監禁。張去年捱不住,猝死獄中。

鄧龍威本處男作喺書展銷量唔錯,仲要加印應市。

由鷹君爭產講起 陶傑:紙媒應繼續存在

上期《壹》仔搵嚟唔少高層、前員工、專欄作家同讀者等,講吓自己同嘅緣分,當中才子陶傑似乎未夠喉,上星期喺自己 Facebook專頁,簡介今年六月尾《壹》仔 1425期講發展商鷹君爭產風波嘅封面故事,話呢類古仔唔只講豪門恩怨,仲係涵蓋多個學術領域嘅通識書,冇可能用網絡滾動新聞就講得清楚,最後仲借用羅老太一句「要錢就冇阿媽」,問讀者「要慳時間定要真相」。

陶傑讚羅家後代教養好,係香港成功故事嘅典範。佢提到鷹君十幾年前發展旺角朗豪坊,話中資唔會好似鷹君呢啲香港財團識得去經營商場,希望羅家為香港整體利益團結一致,第三、四代都繼續留港咁話。

成日講紙媒沒落,網上報導講求精簡,陶傑都話寫專欄二十年,字數要求愈寫愈短,但好多嘢唔可以精簡,要「盤古初開,細說從頭」,又話《壹》仔封面、標題嘅震撼力,係用手機睇新聞冇得比較,印刷媒體應該繼續存在。

陶傑簡介本刊鷹君爭產風波嘅封面故事,其中一個原因係希望羅家後代可以好好坐低傾吓。

二千三百幾字喺 Facebook算係長文,但網上反應都唔錯,陶傑話「如果長嘅唔得,點解又有網絡閱讀版?」(陶傑 Facebook專頁截圖)

撰文:巫不言

news@nextdigital.com.hk


鍾意就快D Share啦!