熱爆娛樂: 校長 high爆晒畢業相　倫仔返港即做廿四孝陪 Wendy [壹週刊

2017年8月3日星期四

校長 high爆晒畢業相　倫仔返港即做廿四孝陪 Wendy [壹週刊 - 1430] __,M1,

探熱針

校長 high爆晒畢業相　倫仔返港即做廿四孝陪 Wendy

倫仔譚曉風自小文武雙全，即使已經二十一歲，譚校長（譚詠麟）都甚少將囝囝的威水史掛在嘴邊，無非想 Wendy兩母子不被騷擾，好好過日子。

直至日前，譚校長竟然一反常態，攬住著畢業袍的寶貝仔曉風影合照，原因是倫仔在英國牛津碩士畢業咁大件事，梗係要開心「些牙」！

倫仔唔單只讀書叻，為人亦好孝順，長年人在外地，早前由美國做完交換生返港，隨即抽時間陪媽咪，同 auntie撐枱腳，連譚校長都話曉風有今時今日的成就，全賴 Wendy教導有方！

陪 Wendy撐枱腳

對於自己的學業早有規劃的倫仔譚曉風，於尖子大學英國牛津畢業後，再轉到前任美國總統夫人米歇爾（ Michelle Obama）所就讀的普林斯頓大學（ Princeton University）做交換生，修讀 Computer Software Engineering。踏入暑假，倫仔早前返回香港，《壹》仔見到廿四孝乖仔曉風陪阿媽 Wendy撐完枱腳，二人於銅鑼灣登龍街口巧遇張崇基，倫仔主動打招呼，一行四人企街圍住吹水，身高六呎，高頭大馬過人的譚曉風分外惹人注目。

其後母子會合埋友人，朝住時代廣場的方向，行到斑馬線位置，倫仔同媽咪、 auntie道別，然後同朋友走到對面馬路買雞蛋仔，邊行邊食好貼地，之後行到利園坐小巴返回跑馬地住所，好慳家完全冇少爺仔性格。

六呎高的倫仔同 Wendy拍埋似姊弟多過兩母子。

倫仔好細心護送完媽咪同 auntie離開，自己先搭車走人。

作為星二代，倫仔行住食雞蛋仔，又坐小巴出入，生活勁貼地。

街頭巧遇張崇基，倫仔同 Wendy企街齊齊吹水。

開心些牙

眨吓眼譚曉風已經二十一歲，並順利於牛津大學碩士畢業，以往絕少將家事掛於口邊的譚校長，竟然忍不住攬實著畢業袍的倫仔影合照，上載社交網站，雖然張相只見到曉風背脊，但對於一直採取保密作風的阿倫，已經是一大突破，阿倫並留言說：「太開心了！原來一個不留神 Harry Pottam（倫仔暱稱）已經碩士畢業了！」據知校長還邀請了拉姑兩公婆以見證開心的一刻。

尚有兩星期，阿倫要同阿 Sam孖咇舉行的「阿 Sam&阿 Tam Happy Together演唱會」，忙住彩排的阿倫加上囝囝順利大學畢業，心情分外 hyper，日前同友人於中環皇后大道中等車期間，發現記者，他主動揮手打招呼，隔住條馬路向記者說：「中環更呀？」然後逐一通報友人，全程蓮子蓉般的面口。

倫仔牛津碩士畢業，一早預備蛋糕慶祝的譚校長忍唔住晒合照，開心「些牙」。

獲邀出席倫仔畢業禮的拉姑，作狀送花俾扮畢業生的譚校長。

自小拔尖

譚校長同情人知己 Wendy（朱詠婷）所生的獨生子譚曉風，細細個已是尖子，十一歲考獲六級鋼琴、識打鼓、彈結他，最重要擁有同譚校長餅印一樣的明星相，加上一三年曾為爸爸的專輯《 70、 80、 90後》做和音，一度令唱片公司對他虎視眈眈，有意力捧他做最強的星二代，不過譚校長一早落閘放狗話：「諗都唔使諗！」的確倫仔成績彪炳過人，一○年成為十優狀元，兩年後於英國 GCSE（英國中學會考）考獲 12A*的成績，走去做藝人，未免太過大嘥。最後倫仔成功考入英國牛津修讀 Engineering Science（工程科學），現時正於溫哥華一個軟件開發公司做軟件工程實習生。