在巴黎第三區的 Hotel Jules& Jim見面，老闆還準備了房間給 Sony換裝。然後轉角又是 Sony常光顧的服裝店。
壹些事壹些情
法國女諧
Sony Chan這洋名，大概你會想起不知何時聽過；要是給你這提示：他/她帶領法國電視節目上眾多嘉賓主持，大唱「還願你跟我盡情擔遮扑振英」，洗盡了港人面書的版，你該不難拼湊出對他/她的印象。法國演藝界內的亞洲人面孔寥寥無幾。從電台小節目做起，再成功轉戰熒幕的華人，更只有 Sony一人。
寫「他/她」，因為 Sony從不諱言自己的男兒身、女兒心。
愛美愛打扮愛名牌的 Sony，早於十七歲便以「她」示人。
十一歲隨父母移民法國後，她的珍藏讀物是《穿 KENZO的女人》，跟錢瑪莉一樣， Sony讀過番書，做過時裝買手，還通曉中、英、法文；現在是法國藝人及諧星。
除了「非男非女」的形象，她的毒舌和誇張打扮，也令法國人另眼相看，「鍾意我嘅 fans覺得我好抵死、好頂癮，亦都有人好鬼死憎我。」即使不明白她的法式幽默，聽到以下這番話，就會明白這人詞鋒有多銳利，「我有小小貼士想俾我哋嘅新特首林鄭，佢成日著長衫（旗袍），你知唔知其實佢有苦衷？因為佢想親民啲！大家覺唔覺得佢十足美心皇宮嘅侍應咁？」
憑着一首諷刺港共政權的改詞歌曲在香港竄紅， Sony本來在香港某電視節目有機會亮相，最後該節目卻因為「政治因素」被抽起，令她深感無奈。步入不惑之年，但遠在九千六百公里外，亦感受到做藝術也會有政治壓力。決定不聊政治， Sony就在面書上大談時裝穿搭和法國文化，教網民講地道法文。
最近林鄭出席電影首映禮，一身鮮紅蕾絲裙到場，熱愛時裝的 Sony透過 WhatsApp點評，形容林鄭一身少女打扮充滿「震撼性」，「好少見佢咁嘅打扮！」又言：「佢對腳又唔係太粗，佢嘅年紀嚟講，對手露出嚟大家都可以接受。問題係咁少女嘅裙，唔襯佢個頭。佢個頭係典型小學訓導主任嗰啲樣，其實同呢啲少女 feel嘅嘢，係完全無關囉！」
由「 Slash」到明星夢
記者和攝影師遠赴法國街頭為 Sony拍照，不但惹來途人目光，也有人耳語說：「 Je l'ai vuà France 2!（我在第二台見過她！）」縱然說得一口流利法文，華人要在法國電視登台，又談何容易？
小時候是西灣河街坊，小學放學後就和同學結伴，去太古城中心的 Sanrio看 Hello Kitty和 Little Twins Star；有時做功課也要做到十一、二點。直至家人生意失敗，一家人移民法國小鎮，重新開始。
成為藝人前， Sony畢業於建築系，為了陪伴居於香港的外公而回流。找不到建築師工作，惟有以自由身接室內設計項目和翻譯，就跟現在的「 Slash」一樣。不久後在報紙上看到招聘時裝買手，要求巴黎香港兩邊飛，貪靚又會法文的 Sony二話不說就去應徵，輕鬆拿下這職位。
但是她始終對舞台念念不忘，深知香港不能實現自小以來的明星夢，被裁員後便回歸法國，從電台小角色做起。
法娛圈的獨一無二
法國人對當地亞洲人的印象不外乎開餐館、開洗衣店、勤力賺錢、說話不多等等，要成名，讓法國人接受亞洲人也可以做藝人、搞創作， Sony的策略就是要「誇張」。言談誇張，打扮也要誇張。「佢哋見到黃種人，個腦會諗到乜先？我俾個 example你，成個法國電視台、所有電視台，冇一個黃種人。」直至最近，才有名亞洲面孔的女生上節目教煮 fusion菜。 Sony稱，自己是當地娛樂圈中唯一一位亞洲人。
「有時我會醜化自己，我會特登扮到好似好唔識嘢，或者做啲好暴發戶嘅行為。因為佢哋法國人個腦入面，對我哋黃種人就係咁睇。我就要做啲嘢，去諷刺佢哋呢個錯誤嘅睇法。」電視清談節目的情節，或是電台稿，不少也是 Sony自導自演。明白內裡意思的觀眾覺得她「抵死」、「頂癮又搞笑」，若有人不明白？ Sony笑言：「（佢哋）就好鬼憎我，有啲法國人真係好鬼憎我，佢哋直情覺得，嘩！呢個就係典型中國人最鍾意就係買衫，著到自己懶靚。」
從不否認自己貪靚，更經常出入名店， Sony認為打扮也是一種投資，「我覺得呢個場合我需要呢件衫，呢個我唔慳得，你明唔明？例如一個大型節目，係有 sponsor，但係如果你著 sponsor嘅衫，你同隔籬啲同事咪差唔多款囉？」網上的照片和短片，極少見她以相同裝束示人；買了新衫新鞋，又會立刻上載照片跟粉絲分享。
「鬼仔心散我就𤷪」
不是要顛覆法國人對亞洲人的所有刻板印象，但起碼要展示，創作不是「白人」的專利。雖頻頻上電視和主持電台節目，但編劇費才是 Sony收入的主要來源，「呢度你寫一啲搞笑嘅環節，或者劇本，全部會計番晒版權費。」
用廣東話教網民說法文，又在巴黎教法國人說廣東話，她說早於在香港居住的十一年，已經塑造了她的港人特質，而且現在還會發噩夢，夢到小學上課時突擊測驗。
在法國工作十多年，她仍然未能接受外國人寓工作於娛樂的習慣。「啲鬼仔好鬼死心散㗎嘛，一路彩排一路睇手機，一陣間又溝女，一陣間又蹦蹦跳打個筋斗，我就𤷪晒嘅。」她心目中的香港人做事認真，還有輕微「磨爛蓆」，「一路做嘢、一路開心、一路笑、一路遊戲嗰啲，我唔識㗎！做嘢就做嘢，食嘢我都可以 skip。」
現實中的錢瑪莉
十一歲當年移民法國，就像跟香港「閃分」，沒有網絡、沒有智能電話、沒有 facebook的年代， Sony跟香港的連繫彷彿只剩下跟外公通長途電話，和幾本哥哥從香港帶走的珍藏書。
如果近年女強人的代表是「 Mall姐」，七、八十年代的女強人就是《穿 KENZO的女人》中的錢瑪莉。「呢本書係講一班七、八十年代喺中環返工嗰啲好巴屎閉嘅單身女人。講佢哋喺香港呢個咁繁榮嘅地方，點樣浮沉、點樣搵錢、點樣搵老公、點樣增值自己、點樣迎接將會嚟到嘅九七，諸如此類。」當年《號外》的專欄「穿 KENZO的女人」被集結成書，多年來 Sony仍對此書珍而重之。
錢瑪莉在書中被前男友大罵：「我同你的皮鞋、手袋、汽車、衣服、 suntan lotion有什麼分別？ Can't you see? I am just one of your accessories!」同樣在事業闖出一片天， Sony對男友，相信從未把他當作一件飾物。
何須分男女
拍拖十六年，跟男友第一次相遇，是在公寓門外。直至 Sony數月後是時候搬走，男友才決心表白。「我聽佢講第一眼唔知（男兒身），後來佢同看更傾，定唔知點樣知道咗。看更好八卦㗎嘛！知道咗之後佢又覺得可以認識咗個人先，或者可以做普通朋友，慢慢佢就覺得我性格好啱佢。」談起廚師男友， Sony說喜歡對方的純良、細心，也喜歡他一手好廚藝，即使上班煮了一整天的菜，仍然願意為她切菜、料理、擺盤。
坦誠面對自己的性取向和身體， Sony一直慢慢以行動向家人出櫃。從小身邊的密友都是女性；喜歡玩 Barbie和 Hello Kitty；十七歲起留長髮，父母只問：「做咩仲唔剪頭髮？」 Sony只是側側膊說：「唔剪住喇……遲啲先」至今，父母亦未曾過問她的女性打扮或交男友。
「其實我覺得，呢啲所謂咁樣就係男、咁樣就係女，我唔係咁樣睇嘢囉。我覺得最緊要係做自己、舒服。」言談間， Sony不時提及家人對自己的支持和關懷，造就了她今天的自信。黃皮膚，在白人的世界登台需要信心；男兒身，以女裝示人，更需要自信。
對於性別問題， Sony一直說「不用留手」，而她的回答不只是防衞，更像進攻，「就等如，好似薛家燕咁有粒癦，如果你死都形住，好唔掂喎大佬。你又要去割，一陣又 laser又發炎，搞你一餐懵又要使錢，係咪先？但係如果你無嘢嘅，咁咪變咗你個 trademark囉？」
樂觀便無敵，上學時期同學對她的嘲笑，她說早已採取「鴕鳥政策」，全部記不起，「我覺得你總有嘢俾人話，話你肥又得，話你醜又得，話你屋企有錢得滯你係富二代又得。睇吓話你邊樣咋嘛！」話畢，拿起酒店餐廳為她特製的雞尾酒，淺呷一口。
港女黑面 法女句句有骨
有特製雞尾酒喝，因為 Sony和酒店老闆是老友。一句說話，老闆就借出餐廳拍攝，連換裝的房間也為我們準備好。
Sony熟悉法國文化，又有法國男友相伴，那麼……法國男人都是傳說中浪漫非常的嗎？她說：「每個人對浪漫嘅定義都唔同。」
她又告誡港女不要動輒「黑面」，「你一黑面就係同對方講：『你做錯咗。』但係一個男人，佢都唔會想覺得：『吓！我今日又做錯？乜原來我隔日就做錯一啲嘢？』我覺得咁樣好冇情趣。」她提醒不要以「做人好真」為藉口，要顧及對方感受。
法國人對小事不執着，不過原來法國女士也不能小看，雖然不會黑口黑面，但是卻句句有骨，「法國女人個心理戰同你鬥起上嚟，你真係頂佢唔順。法國人嘅語言其實好多 layer，佢無形中嘅有骨，如果你法文好，真係聽到你背脊骨落。」 Sony解釋。
「浪漫生活冇一個形式，只係個氣氛浪漫，有生活情趣。」就是她為「浪漫」所定的一個總結。
撰文：劉卓瑩
攝影：劉瑜
news@nextdigital.com.hk
|
鍾意就快D Share啦！
|
|
|