吳京自導自演的《戰狼2》喺大陸票房大收旺場之際，有消息指吳京與甄子丹合作拍《殺破狼》一片時遭甄子丹打壓，事後甄子丹在微博發文否認，指文章捏造，並揚言為此報道感到憤怒。
今晚甄子丹、呂良偉與太太楊小娟、蘇永康等出席紅磡一慈善齋宴，甄子丹表示現拍新晉導演勵志片，講到與吳京的是非，他稱：「是非成日都有，幾年嚟凡親有動作電影都會拉我落水，事無大小都關我事，之前吳京都出嚟澄清咗，我都有add佢，其實冇咁嘅事，如果要講真係成匹布咁長。」
丹爺話：「《殺破狼》係Ba叔（陳達志）投資，當年吳京係冇嗰幾場戲嘅，係我拍枱要監製加番，叫Ba叔攞多500萬出嚟，先至有後巷嗰場戲，呢幾年有啲不良份子，將我哋友好嘅視頻同鏡頭剪成唔好嘅嘢，佢哋喺網絡用心不良，呢頭又話我同阿黎（黎明）唔好，嗰頭又話我同成龍、李連杰唔好。我日內都會見李連杰，同黎明都搭晒膊頭架，自己呢幾年專心拍戲，但啲人實在太離譜，濫用我嘅點讚同截圖，吳京都支持我用法律途徑搵公安，洪金寶都要嗰啲鍵盤戰士唔好搞咁多嘢。」
問丹爺同吳京熟唔熟，佢話：「我哋拍完已經少接觸，同吳京唔係好熟。」
係咪唔開心所以發聲明？丹爺就稱：「一直唔係好理，但網絡太大，控制唔到，但自己睇到真係好唔開心。其實一個人朋友多唔多就知道做人ok唔ok，今次實在太離譜，作得勁過啲電影編劇，啲人別有用心，傷害我同傷害其他人，我搵咗專業人士處理。」
丹爺又讚吳京帶動動作電影，佢話:「佢好有實力，好努力拍戲，我比十個like佢，用咗3年時間，好有意志，我未必做到，好值得大家欣賞。」佢話自己冇試過睇唔起吳京，問有冇諗過拍一部戲超越對方50億票房時，丹爺稱：「冇諗過，我只會超越自己嘅啫，同埋我唔會同人比囉。」
呂良偉被問到好友丹爺同吳京是非時就話：「我知私底下佢哋友情唔錯，啲人將吳京拉埋子丹嚟講，對子丹好唔公平。子丹有同我講唔開心，我同佢講樹大招風吖嘛，成功人仕會比人抵毀，我叫佢唔好咁介意。」
|
鍾意就快D Share啦！
|
|
|