成日擔住口大雪茄、滿口英文、喜與英國貴族打交道嘅鄧永鏘，於英國病逝，終年63歲。佢一班好友個個慨嘆咁話好突然！人就係咁化學，鄧永鏘因為患有重病，聽醫生講話自己只得番一、兩個月命仔，所以臨走前都話要喺英國搞番個告別派對。佢話與其死後個個親朋好友喺佢喪禮出現，倒不如死前搞個告別派對，起碼可以親眼見多次喎！
喜與英國貴族交際 終年63歲
派對未開始， 已有超模「黑珍珠」娜奧美金寶（Naomi Campbell）同Eva Herzigova親自嚟探病兼玩自拍。佢本來打算搵班名人明星嚟同佢食最後晚餐、玩埋個告別派對，諗住玩夠、食夠、好頭好尾等「倒數」埋單，點知人算不如天算，個派對都未開始，佢就已經等唔到，都算係含恨而終！
雖然鄧永鏘算係出身大戶人家，佢阿爺係已故富商鄧肇堅，不過十個有九個都爭啲以為佢係流住blue blood 嘅英國人，因為佢生前成日話同已故王妃戴安娜、英國王儲查理斯等皇室成員好老友！不過，人走茶涼，真係一啲都冇錯，鄧永鏘成日話同戴安娜未結婚前已認識，又話戴安娜喺巴黎炒車過身當日都有同佢傾電話，點知之後戴安娜囝囝威廉王子結婚時，竟然冇請佢去飲！
「請幾千人都冇請我」
嘩！全世界都成日聽鄧永鏘話同戴安娜老友㗎啦，依家世姪結婚，大排筵席請幾千人，竟然冇請到鄧永鏘呢位世叔伯？仲要鄧永鏘成日話三十幾年前同威廉個阿嫲、即係英女王跳過舞喎！同你阿嫲又跳過舞、同你媽媽又話friend過，條數點計先？就連鄧永鏘本人當年都酸溜溜咁話：「都冇請我，佢請幾千人都冇請我。唔會唔開心，我係同戴安娜友好，同佢個仔威廉都係朋友，不過呢幾十年，佢有自己嘅朋友，希望佢呢段婚姻將來好成功，好happy ！」面係人哋畀嘅，架唔通要自己丟咩？鄧永鏘話晒都係爵士嚟㗎嘛，唔通潑婦罵街鬧世姪威廉王子咩！
好似當年鄧永鏘再婚，威廉王子冇去飲都算，連威廉老竇查理斯都冇影，吓？老友喎！不過掹車邊都叫做有個英國皇室成員嚟到賀吓嘅，咪就係N年前同安德魯王子離婚嘅約克公爵夫人莎拉囉！如果話鄧永鏘有咩遺憾，莫講話搞唔成最後嘅告別派對，呢鋪世姪結婚唔請自己，都算係另一個遺憾，話晒佢咁喜歡同英國上流社會打交道！
|
鍾意就快D Share啦！
|
|
|
