上個月啱啱過咗42歲生日嘅黃浩然，14年患上罕見嘅「貝賽特氏症」，喉嚨發炎潰瘍(新聞連結：http://bit.ly/1qa3aKS )，搞到要全面停工留喺醫院休養，原本接咗嘅劇集《張保仔》亦要由洪永城臨時頂上。老公有事，最擔心操勞嘅肯定係黃太KaKa，當時佢要身兼兩職，又要照顧兩個小朋友，又要照顧老公，搞到成個瘦晒。所以黃浩然病好出院，第一時間就係開口多謝老婆。
曾喺「死門關」走咗一圈，過去兩年，黃浩然決心戒煙，做運動操fit，間中又有老婆炮製嘅愛心飯盒同老火湯，現時黃浩然身體已無大礙，近排除咗接大台劇《果欄上的江湖大嫂》，又接戲接大陸劇，趁後生，搵得幾多得幾多，畢竟，兩個小朋友，一個6歲、一個就只得4歲。
日前(1日)晚上11點，《蘋果》見到黃浩然喺北角七姊妹道，泊低所揸嘅舊款mini，一支公快步走入一間茶餐廳食晚飯。現場所見，黃浩然嗌完碟頭飯同凍飲後，就耷低頭撳電話，到飯嚟嘅時候，記者見佢將飯大啖大啖送落口，似乎好肚餓咁，話咁快已經食咗大半碟。
雖然現場有好多食客認得黃浩然，甚至有人拎定電話十五十六想行過去同佢影相，不過由於黃浩然食得太快嘅關係，食客想搵「落手」嘅機會都冇。話口未完，黃浩然已經將碟飯同凍飲安全送到落肚，拍拍肚皮起身埋單走人。由落單到食完到埋單到上車走人，前後唔使15分鐘。
辛苦搵嚟志在食，咁夜醫肚已經唔健康，加上食得急對個胃唔好，之前試過大病嘅黃浩然，真係要學吓點「慢活」先得。
|
鍾意就快D Share啦！
|
|
|