單親媽媽吳綺莉（Elaine）和囡囡吳卓林今年年初因交友問題發生爭執，其後卓林入院留醫兩個多月，期間Elaine在記招中壓力爆煲聲淚俱下求女兒回家，最後Elaine守得雲開，卓林重投母親懷抱之餘，更稱從來沒有嬲過她，兩人和好如初，事件亦告一段落。不過，母女關係最近卻再度出現變化，據知卓林停學期間，Elaine依然每個月付17,000元為囡囡在國際學校留位，可惜卓林早已厭倦學校生活，有見及此，Elaine安排她在家學習配合其需要，但卓林始終無心向學，最後更輟學離家出走！
天台牙煙吹水
一直與外籍同性「網紅」好友A小姐過從甚密的卓林，離家出走後，更正式搬入對方的灣仔舊樓中同居。她們間中會走出溫馨「蝸居」到區內吃喝玩樂，有時更會約三五知己走上天台「Chill一Chill」，在鬧市中的「小天地」食煙吹水飲啤酒。東網記者就發現有次兩位女友人在天台邊緣危坐，睇落相當牙煙，事後她們亦遺下煙頭、玻璃樽等垃圾。
最近，東網記者發現卓林與外籍女友人轉私竇，從灣仔舊樓搬到私人屋苑，更在剛剛過去的星期六早上11點半時被拍得兩人在屋苑會所出現。當時，她們均上身穿着運動Bra Top、下身包住毛巾，在會所游泳池游完水後，頭髮仍然濕透的兩人步出會所門口點起香煙，並坐在旁邊的石壆上扯煙回氣。約五分鐘後捻熄煙頭，走到屋苑其中一座住宅大樓地下準備上樓，行前面的卓林以純熟的手法撳密碼，相信她已在「新竇」住了一段不短的時間。
大門永遠為卓林而開
東網記者致電Elaine跟進她與女兒的關係，問囡囡是否離家出走？她語帶無奈說：「其實佢冇喺屋企住一段時間，我同佢一直有保持聯絡。佢11月就18歲，都好大個，唔可以吓吓都管住晒。（知佢搬咗去私人屋苑？）我自己就冇朋友住嗰度，但唔知佢有冇朋友住嗰邊，所以佢知密碼都唔出奇。」提到卓林輟學，Elaine卻有另類想法：「學習唔一定係要返學嘅，佢有同我講佢依家教小朋友普通話，咁呢種都係一種生活體驗嚟，主動去工作係好事嚟，總好過溫室生活。」
問有否向卓林支付生活費？Elaine稱有提供基本開支：「應該要畀嘅都有，但唔多。（幾千蚊？）總之應畀則畀，佢咁大個都應該要學點樣自己生活。」面對囡囡決心離家，Elaine作為母親只能無奈接受，又強調屋企大門永遠為女兒而開：「鍾意幾時返就幾時返，阿媽我永遠都會歡迎。我哋都有聯絡嘅，又生活喺同一天空下，個心係連住嘅，唯有當佢去咗生活體驗。」
|
鍾意就快D Share啦！
|
|
|