鍾鎮濤舊愛、現年59歲嘅陳秋霞驚爆患乳腺癌，幸抗癌成功走出鬼門關，上月更來港睇譚詠麟同許冠傑演唱會，一頭白短髮嘅秋霞面龐飽滿，精神奕奕。
1981年嫁到馬來西亞嘅陳秋霞，跟金獅集團主席鍾廷森育有三女，擁有幸福家庭，早前秋霞喺當地出席新書《因緣．音緣》分享會，驚爆去年中確診患乳腺癌第二期，當時感到晴天霹靂，透過寫書抒發情感，對病情有好大幫助：「之前聽人講女性喺60歲後唔使擔心患上乳腺癌，所以自己喺30、40歲時，每年都檢查一次，近年冇咁頻密，結果一驗就係乳腺癌第二期。」
去年6月，身在香港嘅陳秋霞覺得唔舒服，還以為耳水不平衡發作，點知檢查後發現患了乳腺癌，姨甥女鄺靄慧係養和醫院乳腺外科名譽顧問醫生，即安排接受長達半年嘅抗癌療程：「病咗就去醫，癌症唔一定係絕望，點解要輕言放棄，我還有明天！」陳秋霞喺4個月內接受8次化療及腫瘤切除手術，積極同癌魔打仗，其間沒有停止寫書法同畫畫，並盡量完成新書寫作。
陳秋霞早前接受當地傳媒訪問表示：「剛開始嗰關最難過，但調整心情之後，每一步就唔難了。最緊要唔好壓抑，要適當抒發情緒，如果病人仲要擔心點去隱瞞同避開親友，反而會加重心情負擔。」接受長達5小時手術時，陳秋霞擔心皮膚會乾，喺醫生同意下敷住面膜入手術室，笑言當自己去做facial；之後因化療出現嘅甩頭髮副作用、不定時發作嘅疼痛，陳秋霞都笑着面對：「如果我突然唔出聲，我唔係發脾氣，只係因為唔舒服。」
11月做完切除腫瘤手術，翌日起床即拍照留念，相中嘅陳秋霞舉起左手為自己打氣，留院期間，唔想瞓喺病床上亂諗嘢，陳秋霞叫女兒帶紙筆到醫院，醫護人員對封佢做「模範病人」，陳秋霞笑說：「我盡量做一個唔難相處嘅病人，醫生、護士、家人都係嚟幫我，點解要對佢哋發脾氣，抗癌好痛苦，照顧我嘅人都好辛苦。」陳秋霞回想接受化療嘅日子，當頭髮甩得七七八八，有朋友提議佢剃光，陳秋霞卻說：「你唔係我，唔會明白。當你擁有好多頭髮，可能唔會覺得點，但當你所剩無幾，就會明白至少還擁有嘅心情。」佢好珍惜僅有嘅兩撮稀疏頭髮，更笑言可以梳丫環髻。現在走過抗癌之路嘅陳秋霞，大力推動乳腺癌醒覺教育，希望女性能正視呢個病。
鍾鎮濤對於舊愛患乳腺癌，佢回覆《蘋果》表示：「聽到這個消息好唔開心，雖然最近少碰面，希望佢可以好快無事，繼續玩音樂和寫書法，做她自己喜歡做的事情，祝福她早日康復。」
|
鍾意就快D Share啦！
|
|
|