「江胡恩怨」又起風波！66歲資深大律師胡漢清跟46歲舊愛江希文分手擘面，有報道指胡漢清上月到香港仔警署報案，舉報有人妨礙司法公正，由港島總區重案組負責調查，暫時未有人被捕，報道指事件疑涉及兩人分手後安排。
胡漢清昨日被拍到現身灣仔社會福利署。及後他受訪時拒透露詳情，稱不想影響司法程序。
糾纏五年嘅「江胡恩怨」越搞越大鑊，2012年兩人撻着一個月即閃電訂婚，翌年江希文為胡漢清未婚生女，囡囡Natalie現四歲半，惟三年前江胡情玩完，兩人分手後更反面收場，為女兒嘅生活費同撫養權對簿公堂。
對於傳被胡漢清報警一事，《蘋果》今日聯絡江希文及警方了解，但未獲回覆。其胞姐江欣燕喺電話表示：「佢哋啲嘢，我唔答啦。」問會否擔心妹妹？欣欣無奈話：「呢件事唔知真定假喎，佢哋啲嘢咁複雜，等佢哋自己搞。」問妹妹有否透露情況？欣欣話：「冇喎，你搵佢啦，因為我唔係同佢住，佢都冇同媽咪住，佢自己住。」係咪已搬離胡家大宅？欣欣表示：「佢冇同佢（胡）一齊住啦，但我唔透露咁多。總之佢OK呀，佢同個囡好開心。」
雖然囡囡跟江希文生活，但都有安排父女相處，早前胡漢清約男友人喺L Hotel食晏，就帶埋囡囡邊食邊傾工作，其間仲同囡囡玩錫錫，被讀者Kim透過「爆相爆片」分享，讀者喺電話表示：「嗰日下晝三點幾見到佢哋，本來冇留意胡生，因為佢囡囡好得意，行嚟行去玩，之後認到胡生，佢講嘢比較大聲，同朋友傾工作，囡囡好cute，胡生見囡囡悶，叫咗朱古力雪糕畀囡囡，仲親自餵囡囡食嘢，好似慈父。我仲聽到囡囡話搵媽媽，胡生話媽媽今日唔得閒，今日同我一齊啦。佢囡囡都滿口英文，兩父女用英文溝通。」
| (讀者Kim提供圖片) | | |
| | | |
| |
|
鍾意就快D Share啦！
|
|
|