掃呢頁CODE去手機

2017年11月23日 星期四

鄺美雲造勢選人大 [壹週刊 - 1446 - 財經] __,鄺美雲,M1,

Cally八十年代以歌曲《再坐一會》紅極一時,但查實佢無論喺事業同政壇上都一直在攀升,變咗半個女強人。中環人語鄺美雲造勢選人大汪阿姐汪明荃入行五十年, ...






Cally八十年代以歌曲《再坐一會》紅極一時,但查實佢無論喺事業同政壇上都一直在攀升,變咗半個女強人。

中環人語

鄺美雲造勢選人大

汪阿姐汪明荃入行五十年,真係如佢名曲一樣「經過那些年」,上週大台幫佢搞場大騷,連早前墜機大難不死的老闆陳國強亦都俾面出席,咪話唔威!阿姐除咗定期有喺大台做主持同高歌外,其實都做過人大代表、及已經做滿四屆政協委員,雖然佢個人就「永不言休」,但最近就有張疑似港區人大嘅「祝福名單」出現,指經營珠寶業有成嘅鄺美雲( Cally)將會接班,成為演藝界嘅代表。

對於傳聞, Cally未有正面回應過記者嘅提問,但就逐步漏口風:其實我每一日都祝福其他人,我都希望大家祝福我,我相信最重要係選委祝福我!」其實呢一切都有跡可尋,本身係江西省政協嘅佢,於九月接受時事評論平台「港人講地」訪問時,力撐國歌法,大動肝火咁強調:「你照吓鏡,你係中國人,要感恩自己是中國人!仲話而家好多人唔唱好國歌,係反叛、唔尊重自己嘅做法,如此出位嘅言論選委當然會醒一醒神。小宗仲幫佢同阿姐做咗個小比併,發現有「鄺美人」之稱嘅 Cally交際手腕高超,做生意又巾幗不讓鬚眉,睇嚟要喺男人堆嘅政圈升呢,絕對難佢唔到。





汪明荃身兼無數要職多年,難怪關德興師傅都題字「女鐵人」牌匾送俾阿姐,以讚揚佢擁有驚人毅力。





Cally(右)多年嚟同不少富商扯上關係,其中一位就係賭王何鴻燊(左),最後兩位感情仲昇華至「父女」。





雖然同鄭家成嘅感情只維持咗短短幾年,但 Cally(左)同鄭裕彤(右)就一直私交甚篤,去年彤叔設靈, Cally都有傷感地去靈堂

致祭。

上海仔唏噓心情

涉洗黑錢超過一億元、於月初被捕嘅五十九歲郭永鴻(上海仔),經常都出入警署,但警方每次都拉到人、落唔到案,好失威!今次佢被扣查廿九小時後終獲保釋外出,但消息指佢被禁離港,要於下月初再返警署報到。上週五佢以一身招牌裝束:白衣、白褲同白鞋,喺喜來登酒店十八樓酒吧出現,身邊保鑣由以往三個,加到六、七個,都難掩其唏噓之情,只能一人把酒對海問青天,背影都幾落寞吓!

尖沙咀喜來登酒店同隔籬崇光,都算係上海仔「地頭」。幾個月前小宗已撞到佢一次,當時佢身邊保鑣攞埋棍、保護住上海仔喺化妝品專櫃買護膚產品;盡責就盡責啦,不過行逛緊嘅女士,就俾佢嚇到個心都離一離!





白衫、白褲、白鞋以及招牌髮型已經成為咗上海仔(右)嘅獨有標記唔少出入酒店嘅人都話見過佢,事關上海仔真係太易認





大人物有保鑣跟出跟入實屬平常事,不過上海仔(中)就零舍霸氣,要六個人傍實行街。

羅老太行動升級

鷹君( 41)羅氏家族陷入爭產,最心痛之人當然是母親羅杜莉君(羅老太),下週一係佢九十八歲生日,而單撤換滙豐案件就排咗喺出年五月審理。羅老太身邊人話,今年生日一班兒孫會喺早上斟茶俾羅老太賀壽,夜晚就會跟家人食飯慶祝,仲話所有兒女都獲邀請出席,但都只能「希望所有子孫都會出席,以盡孝道」。

講番同老太唱反調的羅嘉瑞, 2015年以個人名義持有 22%鷹君股票,呢兩年密密增持十幾次,至現在持有 27%。加上同一陣線的羅鷹瑞有 5%股份,跟第一大股東、由家族信託持有的 33.38%,只差大概 1%距離。家族信託喺滙豐管理下,仍然唔能夠增持股份,鷹君大股東地位就好快落入嘉瑞手中。羅老太時間真係好趕急,話晒第一同第二大股東喺「身價」上大有不同。中環人話,第一大股東基本上話晒事,就算只係比第二股東多少少股份,出去見客人哋都尊重你多啲!羅老太話,阿仔再唔聽話,已準備好將行動升級!





快將九十八歲生日嘅羅老太雖然以輪椅代步,但精神一向好好,每次記者會都會吩咐仔女好好招呼傳媒,真係出心又出力。





羅嘉瑞不停增持鷹君股票,令佢同阿媽關係更趨惡化。

馬亞本親證必拆售中環中心

「小巴大王」之稱的馬亞木,近年絕少出席公眾場合,上星期小宗喺一個潮州鄉里搞嘅飯局見到呢位稀客,見佢精神甚佳,腰骨依然挺直,完全唔似八十六歲。難得遇到呢位百億富豪,當然要問佢近排有份組成嘅財團,向長實以四百零二億天價掃入中環中心七成半業權。

小巴大王話呢單刁傾咗大大話話都有一年,雖然銀碼唔細,但股東們一直冇需要見面傾,交由股東之一嘅盧文端做聯絡人。單刁半年後先至完成,已傳出委託經紀安排拆售,但轉頭又有股東否認,消息可謂滿天飛。馬亞木向小宗親口講,股東之間已有協定,交易完畢之後會分樓,之後各自修行已有股東表明貨如輪轉,點都拆骨賣部分套現。

小宗問佢自己有乜打算,佢話中環冇乜新寫字樓供應,傾向長線收租居多。咁又係,佢老人家向來投資物業都有入冇出,以前買鋪,到近年轉型掃入商場及酒店都係咁樣,食力絕對超班,每月收租都收到手軟,難怪成條街嘅人都話佢身家坐底三百億,肯上市的話,規模大過唔少中型土炮地產股。





馬亞木雖然有番咁上下年紀,但心力財力都仲好足夠,仍然十分活躍於投資市場。





長實賣中環中心創下歷來最大宗物業成交紀錄,成為商界一時熱話。

阿松搞校友會為溝女

老牌名校英華書院最近慶祝二百周年校慶,唔少校友都專程返母校撐場,其中一位係前財爺梁錦松,阿松話佢有今時今日,絕對要多謝英華栽培,事關佢家境麻麻,當年只係掹車邊先讀到預科,為咗專心學習,校方破例俾佢喺讀預科嗰兩年留宿學校,夜晚留喺班房咪書,再在飯堂開帆布床( 30歲樓下應該唔知係乜)瞓覺。

阿松話英華雖然係和尚寺,但預科開始有收女生,好多同學都開始追女仔,部分仲成功有拖拍添。睇見同學春風滿面,阿松都有心思思,不過自己知自己事,自己當年生得非常細粒,又窮又唔夠台型,所以都係專心讀書好過,結果成功俾佢考入港大。

可能阿松對中學冇女溝有條刺,七十年代大學畢業後,同一大班畢業生夾手夾腳成立「港大同學會」,旨在令同學們畢業後保持聯絡。當時包括阿松在內嘅幾名搞手,更在港大附近租咗個竇口,方便互相交流資訊,但同時亦成為一個追女仔嘅好機會,聞說當年喺會址亦撮合咗好幾對情侶開花結果,至於阿松有冇近水樓台就木宰羊咯。





阿松當年雖然掹掹緊先讀到上去,但今日已經成為「英華之光」。





英華有成二百年歷史,二○○三年先至遷至西九龍填海區嘅新校舍。

撰文:宗菁華 


鍾意就快D Share啦!