陰公，真係令人擔心！
歌手迪子早前去韓國旅遊，不小心跌倒撼落接近300磅重的鋼櫈，撞甩門牙兼要縫23針，差點毀容！回港後，她接受東網電話訪問時坦言：「初頭好驚，已經唔記得撞到係有幾痛，淨係見到成地血，啲牙甩到成地都係，唔知點算。」
連水都飲唔到
她表示有位外藉客人送她到醫院急救，但由於語言不通，初時未能確定情況：「後來醫生講縫咗23針，好腫，連飲水都飲唔到，好驚個樣以後都係咁。我有通知保險同細佬，但唔敢同媽咪講，因為我喺外地，佢做唔到任何事，我驚佢好擔心。同埋我唔可以有太多情緒，唔可以喊，塊面太多傷口。」
三星期可消腫
幸好迪子入住的民宿老闆是香港人，得到對方照顧：「我日日都好勤力冷敷同熱敷塊面，消腫都消得好快。醫生話兩、三個星期就會消晒腫，依家塊面散緊瘀。等咗一個星期拆咗線，醫生都話我恢復得好好，係可能嘴唇上面有少少疤，但化咗妝應該唔會好覺。依家係要搞啲牙，好彩門牙執得番完整兩隻砌番落去，淨係做神經治療，但門牙隔籬啲牙就可能要靠種牙或者戴牙套，啱啱睇咗醫生都話好快會好番，大家唔洗擔心。」
或要取消工作
問到進食可有影響？她說暫時只能吃流質及軟身的食物，但因為今次意外戒肉了，所以還好。醫療費方面她就表示唔想答：「我淨係可以話，因為唔使入院，保險公司話淨係意外賠得好少。我唔明白香港政府點解對香港市民有關牙齒嘅嘢無Support，台灣同韓國都有，然後香港睇牙好貴，我淨係覺得喺香港生活嘅人都好苦。」對於要延期或取消工作，迪子直言唔好意思，但多謝大家體諒：「希望自己快啲好番，自己都好努力令自己快啲好番。」
----------------------------
東網巨星開咗ig喇，大家快啲follow
https://goo.gl/KGuo2N
來源 source: http://hk.on.cc
|
鍾意就快D Share啦！
|
|
|