掃呢頁CODE去手機

2017年12月28日 星期四

田少捐近萬蚊紅酒俾網媒拍賣 [壹週刊 - 1451] __,M1,

八卦陣田少捐近萬蚊紅酒俾網媒拍賣網媒《852郵報》每逢年尾,都會搵一班政治名人捐嘢出嚟搞拍賣,籌募經費。佢哋老闆游清源仲寫到明話:「亦希望可於年終為員 ...






八卦陣

田少捐近萬蚊紅酒俾網媒拍賣

網媒《 852郵報》每逢年尾,都會搵一班政治名人捐嘢出嚟搞拍賣,籌募經費。佢哋老闆游清源仲寫到明話:「亦希望可於年終為員工發放少許慰勞金──必須強調我是沒有份的!」

今年最矚目嘅拍賣品,莫過於「薯片叔叔」嘅親筆簽名相,不過起價$3333,截至星期一都只係得一個人出價。而起價最高嘅,就係田少捐出 1982年嘅紅酒 Ch漮 eau Margaux,起錶價格$8888,不過睇嚟暫時就唔係好多人有興趣喇。

畫咗幾幅水墨畫賀狗年俾《 852郵報》嘅范國威就話,啲價錢都係 852定嘅。佢嘅畫好似就比較受歡迎,例如佢嘅一幅雪橇狗嘅畫底價$399,截至星期一已經有十五個人出價,叫到一千蚊。其實佢前年畫咗幅《臨崖驅狼》,喺立法會春茗嗰陣諗住「送」俾梁振英,雖然當時幅畫喺混亂期間被整爛咗,不過游清源就請佢再畫多一幅,拎出嚟拍賣。





田北俊仲介紹呢支酒話:「瑪歌酒莊貴為法國波爾多五大酒莊之一,

出品質素毋庸置疑。」



張秀賢初選論壇,遇前學民仔挑機







昔日學民成員,今日變成仇家,張秀賢論壇後喺直播室怒呼:「我化咗灰都認得佢把聲!」

民主派初選進行得如火如荼,候選人都陸續上選舉論壇切磋吓。上星期新東三名候選人就上網台 D100嘅選舉論壇,其間有位聽眾陳先生打上去,挑張秀賢機,質疑對方聲稱得到本民前同青年新政支持但冇證據,有誤導選民之嫌,以及連香港眾志同舊戰友黃之鋒都唔撐佢出選,問佢點團結民主派。

張秀賢回應話,眾志同工黨合作多時,有自己決定好正常,又拉埋咖喱范落水,話呢件事好似民主黨唔撐佢咁,唔係最重要,最緊要係爭取選民支持。陳先生事後都向《壹》仔大鬧張秀賢,話成日借民主動力召集人趙家賢把口講嘢,質疑佢避談本民前同青政支持佢嘅講法,只係怕被 DQ,又話從政者應該有被標籤嘅勇氣。

市民質詢候選人正常不過,但係呢位陳先生都大有來頭,係前學民成員陳展浚,五年前因懷疑私吞市民捐款被勒令退出學民,不過之後佢曾經以學民身份籌錢,而當年學民譴責佢嘅聲明,其實係張秀賢所寫,兩人因而結怨。

立會議員聖誕後收《葵花寶典》







立法會修改《議事規則》大戰,三名超區議員有份撕出紙本版《議事規則》內頁,當溪錢撒。(立法會頻道截圖)

立法會修訂《議事規則》嘅決議案,上星期五刊登憲報,新版亦已經上載到立法會網站。回顧兩星期前嘅修改《議事規則》大戰,民主派議員表決前一邊叫口號,一邊撕出紙本版《議事規則》內頁,當溪錢咁撒,人力「慢必」陳志全仲特登買過本。

其實各議員辦公室都會獲發一份《議事規則》文本,今次《議事規則》改咁多嘢,連「擧」字都要改做「舉」,立法會秘書處回覆《壹》仔查詢話,星期三(十二月廿七日)會向各議員發送經修訂嘅《議事規則》活頁合併版。即係議員聖誕節後,將會收到呢份令人眼寃嘅「禮物」。

有議員助理同《壹》仔透露,《議事規則》修訂通過前幾日,想喺立法會紀念品售賣部買紙本版,不過職員話斷咗貨,要等兩三個禮拜先返新貨。秘書處話,喺修訂《議事規則》嘅決議通過當日或之前訂購嘅版本,秘書處已經向訂戶說明係舊版,亦即係今年二月修訂嘅版本,至於新版就暫時未有人落訂。

咁又係,依家嘅《議事規則》基本上同立法會自閹冇分別,網上又有得睇,如非必要,何必使嚿幾水買本《葵花寶典》?

用《議事規則》敲花枱,梁耀忠要賠錢

《議事規則》修訂被強行通過,立法會「自閹」當日,有成十一個民主派議員被逐,當中梁耀忠、涂謹申同鄺俊宇被逐之前就企喺度,一邊大叫口號「反對修改《議事規則》」,一邊撕爛本《議事規則》,以示抗議。

雖然最終佢哋三個被梁君彥下令驅逐離開會議廳,但係相比被保安抬出去嘅朱凱廸同陳志全,佢哋都係被人半推半行咁趕出去,唔算大動作。不過近日梁耀忠就因為當日嘅事,收到立法會秘書處嘅信。

原來佢當日用本差唔多兩吋厚嘅《議事規則》敲會議室張枱,因為《議事規則》係硬皮書,比一般精裝書仲要硬身,秘書處就出信俾佢,話佢會議當日敲花咗張枱,佢哋會搵人嚟報價睇吓整番要幾錢,當然就要梁耀忠埋單。







可能除咗梁耀忠,其他大動作少少嘅議員,都會陸續收到信。





《議事規則》一本賣成百六蚊,不過因為近日太受「歡迎」而賣斷貨。

撰文:巫不言

news@nextdigital.com.hk


鍾意就快D Share啦!