22年婚姻:轉眼間 22年，與老婆走到見白頭的吳岱融，去年結婚周年，再影一輯婚照， 47歲的鍾淑慧更 keep住一副好身材。
娛頭
捱過七年披荊斬棘吳岱融：多謝老婆溫柔同體諒
58歲的「鷲哥」吳岱融，跟老婆鍾淑慧結婚廿二年，至今依然係甜心夫妻。不過哪有一對恩愛伴侶無風無浪！婚姻第一個七年，是他們最難捱的關口，披荊斬棘，到 01年吳岱融夜店闖禍，鍾淑慧一招溫柔拆解，將吳岱融完全降服，夫妻從此進入收成期。互相退一步，令關係走得更近，是他們致勝之道。
堅持每日傾密偈
「一齊廿幾年，我今年都五十八歲，大半世人，能夠同一個人喺埋一齊咁多年，大家又互相愛錫對方，咁 care對方，佢永遠好肯聆聽我嘅分享，係甜嘅！好慶幸遇到呢個太太，請你幫我同佢講，我好多謝佢。」
與鍾淑慧結婚廿二年的「鷲哥」吳岱融，談及廿載婚姻之道時，說得最多，是「多謝」兩個字。
踏入「銅婚」之年，吳岱融沒因老夫老妻而對情趣鬆懈，反之着緊另一半的感受更勝從前，除灌錄一首暖男情歌《回去愛你十億秒》，給老婆鍾淑慧做禮物，身在內地拍戲的他，亦堅持每天同伴侶視像談心。
第一個七年最難捱
同樣鍾淑慧寧願兩邊撲，飛去新加坡陪伴當兵的兒子過完冬至及聖誕， Boxing Day返港放低行李，當晚就起行去深圳陪伴牽掛的老公。鍾淑慧說：「依家個仔大咗，我哋多番時間過二人世界，兩個仲 sweet過新婚時，因為一切都穩定，唔似後生時為生活為小朋友（兒子），為好多瑣碎嘢去煩，依家大家都可以多番時間 focus對方，好想爭取多啲時間相處同珍惜。」
婚姻從來不是童話，廿二年朝夕共枕，走唔甩陷入關係緊張的酸辣。今日吳岱融夫妻間可以愈走愈甜，是從結婚第一個七年的披荊斬棘調校而成，鍾淑慧續說：「婚姻唔係單單兩個相愛，仲要面對好多現實環境，婚後無耐我哋就離開香港，搬去新加坡重新發展、之後馬來西亞、然後內地，新婚生活都未適應好，就要適應不停轉變嘅新環境，當時對我哋關係而言係一個好大挑戰，加上最初新工作唔係太如意，情緒上大家好易，又有埋小朋友，磨擦係多。
不過最差都係冷戰，過幾日沉澱咗就冇嘢。最重要大家個心想唔想維繫，想的話乜嘢都可以捱過。咁多年，點冷戰我都唔會講離婚兩個字。嗰七年好似將夫妻間問題濃縮晒咁發生，當時我哋為口奔馳，邊得閒七年之癢，大家顧掂有瓦遮頭已經好好。」
修心養性
另一關口是婚後第六年。○一年吳岱融在夜店打交受傷，他以為趕來醫院的老婆會將他痛罵一頓，豈料鍾淑慧只關心傷勢，一招以柔制剛，吳岱融徹底被征服。等候另一半成熟的鍾淑慧，從此進入收成期。吳岱融說：「一般女人遇到老公咁嘅事，嚟到都已經預咗係唔好嘅嘢，但佢嚟到唔單只冇追問，令我好感動係佢冇進一步去攻擊我，或者俾我唔好感受，佢會企喺我一方，陪我過咗呢關。當然之後有向佢解釋係咩一回事，佢亦好明白。呢件事係令我對呢段婚姻更心存感恩，好慶幸遇上佢。我結婚時都三十七歲，我娶佢就認定佢係我一生要照顧嘅伴侶，唔會受任何動搖，我哋咁多年互相都好錫對方，亦因為咁先堅持到頭嗰七年難關。」
蒙嘉慧變肥師奶鄭伊健：肥瘦都咁鍾意
鄭伊健同蒙嘉慧拍拖七年， 13年在東京拉埋天窗。七年之癢冇出現，婚後感情有增冇減。四年來手拖手行街，一起做運動的甜蜜畫面經常出現。
蒙嘉慧收服大細路，她的相處之道就是：令對方過得快樂。老婆萬事以他為先，鄭伊健亦開到口，老婆發福，照單全收。
性格夾收服大細路
鄭伊健兩公婆雖不愛高調放閃，但每次出沒被發現，總是手拖手恩愛到爆。日前兩人去淺水灣醫肚，食完飯行去攞車，拖實老婆的鄭伊健，沿途 sweet talk。
昔日性格內斂的邵美琪同好勝的梁詠琪，都未能把鄭伊健收服，分手收場。好動型的蒙嘉慧跟他夾到爆，一段羽毛球情緣成功箍得住這個大細路。
謝謝你為我遮風擋雨
除了啱嘴型，蒙嘉慧的相處之道，也是她箍緊大細路老公的致勝秘訣。「婚姻之道就係最緊要令對方開心，有咩問題我唔會依賴對方幫我解決，我嘅責任係要令伴侶開心。」她又揀在相愛九周年日子，罕有公開晒愛，在微博寫道：「謝謝你為我遮風擋雨……酒我代你喝，你繼續努力工作吧！」
婚後減產，享受家庭生活的蒙嘉慧，就算身形逐漸膨脹，老公鄭伊健都照單全收，仲話：「佢以前太瘦，依家有少少肉地，無論肥定瘦，我點都鍾意。」
撰文、攝影：娛樂組
|
鍾意就快D Share啦！
|
|
|
