郭永健同太太育有一個兩歲女兒，佢話依家明白做人父母好難，最近要陪個女去幼兒班面試，認為咁細個都要面試，真係好多餘。（受訪者提供）
八卦陣
細孖港大「撈女仔」抱得美人歸
立法會三月補選，民主派新東初選競爭激烈，獲唔少主流民主派政黨力撐嘅工黨郭永健（細孖），最近忙住四出造勢。佢同《壹》仔講起往事，原來佢讀港大時要搵女同學出席活動，好老土咁因為師兄「撈」完女仔之後唔得閒，結果由佢頂上，先識到依家嘅太太。
細孖話當時自己係建築系 freshman，九月要喺校舍撈啲女仔參加宿舍活動，佢宿舍上莊、依家港大校友關注組成員施旭成，喺民主牆出面「兜搭」到三個女同學，其中一個就係當時讀緊文學院嘅太太。由於施旭成唔得閒，於是交咗俾佢負責接待三個女仔夜晚食飯傾偈。
本身睇落怕醜又比較成熟嘅細孖話，當時一對三，「又唔係好驚嘅……」佢選擇同三個異性講啲「正面嘢」，包括話呢三年大學要搵到人生意義呀，同埋要為社會帶嚟改變之類，聽落悶悶哋喎。
佢都知自己講啲嘢老土，結果搞到幾個女仔以為佢係大一兩屆嘅師兄。點知細孖嫂又好 buy喎，事後同佢講番，覺得佢講嘅嘢同其他人好唔同。細孖話最初冇特別睇中太太，但日久生情，依家佢有事第一個就會搵太太傾，太太都好支持佢。
「范大師」畫狗仔 日本人都排隊等
仲有個半月先到農曆新年，但宣布參選新東初選嘅范國威已經好鬼勤力，幾乎日日擺街站，仲寫定揮春同埋畫狗仔水墨畫，出盡力氹新東市民開心。
大學本科讀美術嘅咖喱飯，畫出嚟嘅狗仔都真係幾得意，仲有得揀想佢畫雪橇犬、八哥定係史納莎。原來佢擺街站畫年畫，已經畫咗十五年，佢同《壹》仔講以前好蠢，畫一幅畫要成半個鐘，天寒地凍真係鬼有人肯等佢畫，不過依家佢就學精咗，一幅畫三至五分鐘就畫好。
計計吓，佢每次擺街站可以畫大概四十幅畫，今年佢會巡迴新東一個月擺站，睇嚟畫一千幅年畫真係不是夢。仲有日本人特登預先 email問佢，邊度可以攞到佢嘅畫，上星期日就去咗將軍澳排隊拎「范大師」嘅真跡。
公民黨大狀余若薇嘅字畫出名靚，唔少政黨每次籌款都會搵佢幫手畫兩幅字畫，每幅都以幾萬蚊甚至更高價成交。如果今次新東初選咖喱飯跑出，唔知民主派會唔會嚟個大團結，搵埋佢幫手畫水墨畫籌款呢？
基哥「獅子撲兔」出自四十年前日劇
早幾期《壹》仔訪問過民協九十後新丁黃虹銘，當時馮檢基就教所有新人要「獅子撲兔」，做任何事都要出盡全力。呢句本身係成語嚟，不過基哥同《壹》仔講，呢個講法係啟發自佢初中年代一套日劇《柔道小金剛》。
基哥仲好記得套劇講乜，話劇中柔道師父教識徒弟一招絕招後，徒弟返到學校打遍全校無敵手，最後因為自滿喺一次對決中落敗，被師父責罵「獅子撲兔都會盡全力」，此後佢喺民協，就經常用「獅子撲兔」呢句話勸勉新人。
《柔道小金剛》原名《柔道一直線》，係梶原一騎原作嘅漫畫，一九六九年被改編成電視劇，當年由麗的電視買入版權，逢星期六午間播一集。昔日麗的變成今日亞視，雖然冇咗免費電視牌，舊年四月仲熄埋機，不過上月亞視獲撤銷清盤後宣布復活，以網絡電視模式經營。唔知基哥今次出戰九西泛民初選，可唔可以好似亞視咁翻生呢？
九西初選論壇 兩個夾擊一個
上星期六，九西初選三個候選人去旺角行人專用區出席論壇，不過要成功開檔都唔係咁簡單㗎，就算一早派人去霸位，最後都要同班熱愛勁歌熱舞嘅大叔大媽講數，擾攘一輪先開到壇。
論壇一開始，就已經聽得出觀眾同其中兩位候選人有共同嘅「敵人」，即係民協馮檢基。好幾次基哥發言後都被觀眾噓，另外兩位對手姚松炎同民主黨袁海文，雖然話好尊敬呢位政壇打滾多年嘅前輩，但都雙雙夾擊基哥，追擊民協黨員退黨一事。
答問環節期間，姚教授唔單只放生袁海文，仲問佢：「據了解，民協嘅前高層，後來因為某啲事件轉咗去民主黨，你有咩睇法？」佢講緊嘅就係民協前主席莫嘉嫻去年六月退出民協，十一月決定加入民主黨。袁海文又寸基哥，話海麗邨清潔工罷工都去搵職工盟，唔係搵當區民協區議員楊彧，又話民協副主席何啟明擺街站都唔見有插基哥嘅旗。
可憐基哥論壇上被人打到一額汗，路過嘅快必仲要加把口話：「馮檢基你都搞咗幾廿年，應該俾啲機會後生仔。我講嘅後生仔係姚教授喎，唔係袁海文。」搞到全場歡呼，睇嚟呢場初選，真係唔可以用「勢均力敵」嚟形容。
撰文:巫不言
|
鍾意就快D Share啦！
|
|
|
