最近全城掀起「發呆」熱，古巨基也接受挑戰，前日（20日）穿上白色重型皮褸突襲銅鑼灣鬧市，化身發呆「時光基」站在其演唱會巨型海報前，引起大批途人駐足圍觀，有市民充滿疑惑問：「係咪真人嚟㗎？」「佢唔答我」「佢都唔眨眼」，有小朋友戰戰兢兢埋身掂基仔手臂，更多途人當正基仔是景點，拎出手機跟他自拍，最搞笑有大媽伸出指篤基仔條腰笑說：「我唧你會唔會笑？」基仔十足「假人」一樣完全冇郁動，直至有女童由媽媽帶住走到基仔面前自拍，基仔突然嘩一聲，把女童媽媽嚇到挈大口仆落地，非常爆笑！
紓緩緊張情緒
基仔發呆完畢後，跟被途人捕獲合照，有位準新娘子對基仔說：「我明日結婚，好開心見到你。」又有嬸嬸老實不客氣捽他的面珠，問到基仔是否鍾意發呆？他笑說：「古太就最鍾意發呆。」他自爆是應側田邀請參與「全城挑戰發呆1分鐘」，他指都市人每日都處於緊張的情緒，要有適當的紓緩，呼籲大家關心情緒的健康，並笑說：「我一係唔玩，一係就做好玩啲、得意啲嘅嘢，我特登換番影演唱會海報件衫嚟，扮番騎住時光機個甫士。」挑戰成功的基仔「呆」足5分鐘，自爆有途人笑他像山頂蠟像館的蠟像，由於他要模仿海報上的甫士，所以難度很高，他說：「要彎住身，兩隻手要凌空，原來係好攰，做完我條腰梗咗，因為唔可以眨眼，所以對眼好澀。」隨即清唱：「眼睛不能沒眼淚，個口不能流口水。」非常抵死。
搭巴士玩「基遇」
基仔玩到興起，再即興搭巴士與乘客玩「基遇」，身上有八達通卡的他拎住張50元紙幣在巴士站找人兌換硬幣，之後，跳上巴士的基仔笑說：「嘩，冷氣巴士正！」因為巴士滿座，基仔只得「企位」，但乘客見到基仔出現，開心得拎起手機不停影，基仔亦主動跟乘客合照留念，他又搞笑問車廂內一位太太：「架車經唔經紅館㗎？」太太就耐心教基仔何處落車再轉車，不過，因趕住工作關係，基仔搭了幾個站就落車。之前基仔試過執導並在巴士上拍攝，他笑說：「咁做嘢梗係低調啲，着到咁行搭巴士就第一次！」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
