父親Frederick William Perry於黃秋生四歲嗰陣，離開咗佢哋兩母子，自此秋生同母親相依為命，好少提及生父，只係講過如果將來要拍一部自傳式嘅電影，第一個鏡頭會係四歲嘅佢，望住父親上飛機，拋妻棄子呢個畫面，1997年主權移交，秋生帶住母親赴英「尋根」，無功而還。
秋生去年公開尋親，終於俾佢搵番同父異母嘅雙胞胎哥哥John William及David Frederick。秋生父親係英殖時代香港高級公務員，早年秋生接受傳媒訪問時，講過自己細個長相生得鬼頭鬼相，但又唔識英文，所以成日俾人當怪物咁笑，提到佢因為童年缺乏父愛，所以變得比較性格孤僻，到12歲就打交多過食飯。
對於父親嘅印象，雖然只停留喺4歲，但當年父親有留低咗啲信物，秋生一直保留住，而佢口中講嘅信物，包括一個煙灰缸、煙嘴同埋一隻老虎牙，另外就係一封信同幾張相。秋生仲話父親喺信入面寫啲「吹水」嘢，話自己遲啲會返去。
秋生係混血兒，英文名叫Anthony Perry，秋生講過細個嗰時睇封信會好感動，因為父親寫住「Big Kiss Anthony」，但人大咗再睇番就覺佢係吹水王，不過再年紀大啲，秋生就原諒咗佢。
來源 source: http://hk.entertainment.appledaily.com
|
鍾意就快D Share啦！
|
|
|