嬌妻嘔住蜜月 林奕匡做阿四洗頭侍浴
歌手林奕匡（Phil）和太太李靄璣（Rikko）展開浪漫蜜月之旅，兩人一心諗住狂食狂玩狂煙韌，豈料Rikko餐後懷疑食物中毒，又嘔又屙全身乏力，春宵興致全消之際，好在Phil的愛能醫百病，一夜貼身服侍後，Rikko不藥而愈。
Phil和太太Rikko本月6日在港補擺婚宴後，日前已起程往歐洲展開十多日蜜月之旅，兩人甫抵達第一站意大利，就忍不住在社交網大晒靚人靚景相，可是歎完首個二人世界午餐後，Rikko大呻出事：「第一天，沒有計劃，沒有行程，就是下午吃了roast beef（烤牛肉），然後食物中毒了，之後的整個晚餐也吐了出來。」「愛妻號」Phil亦心痛留言：「Poor Sweetie」。
「嘔咗成碟意粉出嚟」
昨日聯絡上身在意大利的Rikko，她以撒嬌的聲音說：「我lunch食咗啲beef同沙律，食完後6、7點行緊街時，（個肚）都有啲痛O架啦，跟住7點照去食晚飯，食晚飯就係食意粉嘅，食完返到屋企（酒店）時就屙，成身都好weak（虛弱）咁樣，攤咗喺張床度成半個鐘，一坐起身嘅時候就嘔，嘔咗成碟意粉出嚟。」問到是否有孕才嘔吐？她以肯定口脗說：「梗係唔係啦。」
身在異地抱病倍感淒涼，問Phil如何照顧她？Rikko甜爆說老公之前也疑食物中毒剛痊愈，故特別知她所需，除為她張羅運動飲品幫她補水補鹽外，還提供了「專屬服務」，她讚不絕口說：「佢好好，一向都好照顧我，我又攰又冇力，又凍，返到去（酒店）佢幫我整個Bubble Bath（泡泡浴）畀我浸浴，又幫我洗頭，因為我攰到洗唔到頭。」問到錯過蜜月第一夜可感可惜？她害羞說：「同阿Phil有成世人嘅時間相處，我哋都冇乜所謂。」提到老公好錫她，她說：「夫妻就係要互相愛護扶持。」問到可有看醫生？她指休息一晚後身體已無大礙，雖然胃口不佳，但仍可繼續行程，加上自問腸胃好，多年沒有嘔吐不適，覺得今次只是意外，故不會向餐廳追究。況且兩人行程緊密，其中一站要去Phil至愛的法拉利發源地睇車及意大利南部觀光。
食物孭晒上身任揀
苦在妻身、痛在夫心的Phil就講述照顧太太的詳情：「佢好攰，我盡量畀佢瞓多啲，又想攞熱水畀佢飲，點知酒店房冇，知Gym室有水機，仲專登攞隻杯落去，點知得凍同溫水，我就諗不如整個Bubble Bath畀佢，就去咗超市買啲嘢畀佢，仲有飲品同攞啲食物，因為佢冇胃口食好少嘢，知佢一定肚餓，我咪攞多兩隻蕉，各樣飲品，全部孭晒上身，睇吓佢有咩需要。」
文：音樂組
|
鍾意就快D Share啦！
|
|
|
