【《蘋果》專訪】洪朝豐20年來飽受抑鬱狂躁症纏擾，要終生服藥，豈料去年先後確診舌癌和淋巴癌，將他的人生推落谷底。經切脷手術及電療後，洪朝豐總算撐過來重新振作。他日前首度開腔分享抗癌經歷，感激前妻葉桂好悉心照顧，並笑言不再為外貌有變感自卑：「你覺得我條頸好核突，唔係我問題，係你問題。」
洪朝豐曾是香港當紅DJ，去年10月確診舌癌，兩個月後切脷保命，竟再發現患上淋巴癌，幸經多個月治療後，總算撐過來。洪朝豐在本月5日進行完最後一次電療後，重新振作的他，重過新生。
大前日，洪朝豐為電療後首次站出來接受本報專訪，細談今次抗癌經歷，雖然講話時有點口齒不清，但精神不俗。問到今次出來分享抗癌經歷原因，他說：「今次落難，得到好多人幫助支持同鼓勵，包括朋友同學生，如果唔係佢哋，我冇咁容易企番起身，我希望將呢種功德透過我訪問擴散開去，令到多啲人受到幫助。」
切半條脷削牙床骨
電療期間，洪朝豐甩頭髮，面瘦又頸發黑，自覺樣貌嚇人，一度怕出街見人。他說：「原本條頸因為電療關係，係黑色㗎，𠵱家淺色咗好多，但啲位仲痛同癢，如果你見到我，覺得我條頸好核突，唔係我問題，係你問題，又或者你見到我樣唔同晒，話我條脷咁核突，呢個都係你問題，唔係我問題，當我完全接受咗自己，我係一個自由嘅人，我再冇理會啲人點樣睇我。」
洪朝豐曾為保靚聲而拒絕開刀，到內地找中醫治療，結果錯過黃金治療期，可有後悔？他說：「冇，每一個生命嘅決定，都係一場賭博，最緊要你願賭服輸。我開頭唔想開刀，因為我想盡辦法留住把聲，到最後我冇法子唔開刀，因為都冇路走，卒之我淋巴受到感染，得到淋巴癌。」
切去半條脷後，洪朝豐表示進食和講說話也得小心翼翼：「我呢邊左牙床都出咗事，係癌前病變，醫生要削我牙床骨，下面有幾隻牙都攞走咗。將新造嘅脷蓋住左邊牙床骨，蓋住之後新造嘅脷要靠我原本條脷嘅帶動先郁到，所以我講嘢發音上有兩個音發得好辛苦，包括K音同埋個G音。當我講嘢同食嘢時，啲牙會𠝹親條脷，要就住。」
「睇到我存在價值」
被連串病魔打擊，可覺上天不公？洪朝豐苦笑說：「原本我社會聲譽好好，賺好多錢，但抑鬱狂躁症令到我一無所有，神憎鬼厭，我經過好長時間努力，自力更生，然後企番起身教人打坐、唱歌，但個天『噗』一聲，全部攞走晒。我𠵱家冇咗聲我點搵食？個天究竟想點？」
不但受樣貌、謀生能力及進食問題困擾，洪朝豐表示睡覺時不停流口水令他輾轉難眠，碰上電療期間連續幾日落雨天灰灰，令他心情更灰，因而萌起跳樓輕生念頭，他說：「但回心一諗，跳樓死咗就一了百了，但唔死咁點算？累人累物係咪先？」有日，他的打坐學生到家中探訪，送上一本手抄經書，教他嘗試將美好感覺貢給佛陀，洪朝豐一試，晚上竟睡得甜，令他有所頓悟：「突然睇到我存在價值，我同自己講，電療完之後要開始番正常人生活，將美好嘅嘢貢畀人。」
能夠重新振作，洪朝豐要特別多謝他的前妻葉桂好在飲食方面悉心照顧，讓他專心治病。洪朝豐說：「𠵱家同前妻一齊住，真係好微妙，我同佢分開咗30年，但佢願意喺我落難時照顧我。」可有機會復合？洪朝豐笑說：「唔會，佢唔愛我，我都唔愛佢，我哋好似家人咁，咁多人對我好，令到我喺呢方面可以鬆咗一啖氣，我先至能夠有一個轉化。」
採訪：魯吉
攝影：周樂恒
協力：徐家希
|
鍾意就快D Share啦！
|
|
|
