掃呢頁CODE去手機

2018年3月9日 星期五

朋友幫手買驗孕棒 鍾嘉欣自爆:一造就中 __,嘉欣,鍾嘉欣,

藝人鍾嘉欣(Linda)日前宣布再佗第二胎,今日佢就喺facebook開Live分享懷孕心得,佢仲自爆係喺1月1日知道有咗BB添!嘉欣一開始就話:「H ...




藝人鍾嘉欣(Linda)日前宣布再佗第二胎,今日佢就喺facebook開Live分享懷孕心得,佢仲自爆係喺1月1日知道有咗BB添!

嘉欣一開始就話:「Hello~好耐冇見喇!」身在溫哥華嘅佢多謝大家祝福同埋冇忘記佢,佢透露係喺香港知道懷孕,當日出席倒數活動前覺得好唔舒服,佢話:「當日起身化妝啦,好攰呀,化妝師同髮型師嚟到我屋企,我好攰醒唔到,個肚點解咁脹嘅?咩事呢?我係咪食錯嘢呢?」於是到第二日(1月1日)朋友幫佢買驗孕棒,佢好開心咁話:「我有咗呀,係好Meaningful嘅呢個BB對我嚟講,因為係喺New Year's Day知道!我仲即時打畀我老公,佢好開心好感動!」到佢返到溫哥華後佢再話畀囡囡Kelly知:「我叫Kelly摸吓媽媽個肚,同佢講:『媽媽有咗BB呀』!」雖然Kelly得18個月,但好叻識跟住講「BB」!

佢又透露第二胎係計劃之內,生完Kelly後諗住餵一年人奶,等Kelly長大後可以行得走得,就開始Plan第二胎,但佢笑言冇諗過咁快再有BB:「一講…一造就中,呢啲叫做一擊即中呀!」佢話兩胎都係計劃後就有,好感謝上天,不過就未知係男定女!

佢又開心Share囡囡搞笑事同向網民騷出相片,佢話Kelly鍾意擒嚟擒去,趁佢唔為意摷晒櫃入面啲嘢出嚟擒入去坐喺度,非常搞笑!嘉欣又喺度諗唔知BB出世後,Kelly有咩反應,不過就話Kelly好大方,鍾意Share又friendly,相信好快適應咁話!

有網民都問佢心情如何,佢就話第二次做媽媽淡定好多,上次唔知做媽媽係咩反應同感覺,唔知成日去廁所係咪正常!不過佢就話今胎比較辛苦,頭三個月時接Kelly放學時試過喺街嘔,攰到好似感冒成日去廁所,所以未有精神專注拍劇,不過嘉欣向大家派定心丸,佢話知道大家好掛住佢,驚以後見唔到佢拍劇,佢話對演藝仍然好有熱誠,但要畀啲時間佢休息吓,生完第二胎再同大家見面!仲預告可能喺4、5月時返嚟香港見大家呀!


來源 source: http://hk.on.cc
鍾意就快D Share啦!