林子善籌旗擺酒娶無價老婆
無綫藝人林子善與太太董佩欣（Kary）昨晚補擺結婚喜酒，除了湊成星級兄弟團，圈中好友紛紛亮相送祝福，一對新人當眾咀足一分鐘放閃，場面熱鬧。自言太太是無價寶的子善坦言，為了今次婚宴費用「跑山」，更打趣指自己「唔得」，要押後生育計劃。
35歲的子善與Kary拍拖5年，去年10月簽字結婚，昨日於將軍澳一所酒店補辦婚宴。子善邀得袁偉豪（Ben）、馬國明、鄭嘉穎及黃嘉樂等，出任伴郎及戥穿石，唐詩詠更「反串」加入兄弟團。一對新人昨早完成接新娘儀式後，上車兜圈「行大運」，並穿上傳統裙褂步出酒店大堂見傳媒。新娘戴上大大塊金豬牌、五對龍鳳鐲及兩條金鏈，盡顯「貴氣」。
50圍加到63圍
圈中好友曾志偉、黃日華、林峯、林盛斌、岑麗香、林夏薇夫婦、陳山聰與女友等，晚上相繼現身婚宴，場面星光熠熠。一對新人傍晚時分趁賓客未到齊，先接受傳媒採訪，穿紫色西裝的子善與太太「自轉」咀足1分鐘。談到晚上筵開63圍喜酒，子善稱：「原本50圍咋，之後好多朋友都話嚟，所以加到63圍，冇得再加，都要同一啲想嚟嘅朋友講唔好意思。」
今次婚禮花掉7位數，子善表示儲足兩年錢：「除咗無綫返工外，我出面都有『跑山』搵錢，慳啲使囉，結婚我唔會理賺定蝕。（幾錢開門利是？）本來係$9,999嘅，我加咗點，變成$9.999，我覺得我老婆係無價嘅。接新娘易過借火，啲姊妹一見到袁偉豪，門都開咗三分二，再見埋馬國明同嘉穎，就差唔多自動開門。」
提到與太太將來，子善愈講愈眼濕濕，感性地說：「要做好自己先，我唔想空口講白話，行動最緊要。要愛惜自己身體先，先可以照顧到太太，走埋下半生。頭先我未講愛的宣言已經喊，斟茶畀外父外母好感動，我自己太易喊喇！姊妹們有畀嘢叫我跟住讀，但我唔想，因為唔係出自真心，我講自己想講嘅，講三句又喊。」
喊住爆粗多謝至親
問Kary畀子善幾多分？她說：「100分。」子善即回：「畀80分夠啦，咁先有進步空間。（努力造人？）我唔得，暫時未得住，因想小朋友將來生活成長環境好啲，下年啦。」提到老婆手上的1.6卡鑽戒，子善表示：「買唔到最大嘅戒指，但呢隻無論顏色同切割都係完美嘅，值得我買畀佢。」婚宴中，兩人上台致詞時，子善再次邊說邊落淚：「多謝阿爸，多謝阿哥，多謝佢哋細個嗰時打到我Ⅹ街……」之後他亦有多謝將「封咪」的黃子華：「子華今晚唔會到，因為黃牛飛單嘢，子華話費事搞到我個場，之後請番我兩公婆食飯。」
文：影視組
|
鍾意就快D Share啦！
|
|
|
