資深歌手蔡楓華、陳秀雯、劉雅麗、李龍基、葉振棠、袁麗嫦及蔣嘉瑩在伊館舉行一連兩場《真．經典電視主題曲演唱會》的頭場，一開始由魏秋樺介紹香港電視風雲，之後每人輪流出場。適逢4月1日正值已故巨星張國榮（哥哥）逝世15周年的日子，李龍基唱出對方的《儂本多情》作紀念，其後出場的劉雅麗亦唱出哥哥的《明星》及梅艷芳的《心債》，期間觀眾開手機燈營造燈海，劉雅麗表示：「雖然今年係佢哋離開嘅第15年，但我冇忘記過佢哋，佢哋依家變咗做天上星星。」她亦謂兩人的歌一直陪住她成長：「唱歌好受佢哋影響，所以佢哋流傳落嚟好深遠。 」
拍古裝拍到怕
到陳秀雯出場時，觀眾即拍手歡呼，她唱出《馬上英姿》，並謂當年拍古裝劇拍到怕，所以後來就避拍，拍完《穆桂英》系列後近10年再拍古裝劇，演「佘太君」一角，笑言飾演其兒子的演員都很靚仔，包括何潤東、胡歌及彭于晏，並笑言：「我自己個仔都係靚仔。」然後唱出《再見亦是老婆》主題曲《仍然是最愛你》，她笑言後生時常演靚女角色，故做「肥師奶」一角時就慳很多時間，不用就角度出鏡，而她獻唱期間又獲觀眾送花。
開騷講唔停
壓軸出場的蔡楓華穿上黑白西裝，戴上經典黑超出場唱《變色龍》，期間向觀眾送上飛吻，他表示今日百感交集：「有好多嘢想講，但群星拱照，唔可以講咁多。」觀眾即叫他「講啦，唔好喊」，他笑言自己唔會喊。他又講到當年見到潘志文紅好羨慕，後來自己終於有機會，電台總監有一日打給他叫他為一套劇的第一男主角試音：「當時自己喺演戲方面係張白紙，乜都唔識，後來一路拍一路學，經過三個月，後來套劇出街之後啲人係咁叫我『阮文瀚』，我終於明白咩叫走紅。」之後唱出《青春三重奏》。
掹張國榮車邊
接着蔡楓華謂第二套劇做男主角是《IQ成熟時》，笑言：「呢套劇令更多人鍾意我，係嗰時嘅我，唔係依家嘅我。」觀眾即大笑。之後樂隊想起音樂，他即笑住叫停：「我要講嘢，我好耐冇喺伊館講嘢，所以今次畀多啲時間我。」他續謂之後再拍了《我要高飛》，並謂當時過檔很有光榮感，適逢曾勵珍問他過不過去無綫，他即自嘲當年的事：「後來都決定過去，但就整咗個《勁歌金曲》畀我，如果我繼續拍劇，就唔會有『一剎那光輝唔代表永恆』啦。」全場即拍手大笑，他笑言：「我唔單止識唱歌，都幾幽默。啲人話我講完『一剎那光輝唔代表永恆』就走下坡，錯晒，因為有個天王巨星畀我掹吓車邊，就係張國榮。」他又笑言今次是第一次做騷不用唱《絕對空虛》及《倩影》，但電視劇主題曲都不會令大家失望。最後眾人再出場合唱《獅子山下》，為演唱會畫上句號。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
