上個禮拜，張敬軒同商台DJ細So帶咗大家去「女僕餐廳」走番轉，片尾軒仔預告嚟緊會去搵「人妻」！ 話咁快，「天才遊童2018東京篇之人妻飯局」噚晚 (7/5) 就出爐
軒仔帶細So去到人妻屋企樓下，今次自我介紹時，軒仔就話自己叫「渠」；而細So就叫「王」，然後呢隊新晉男子組合「渠王」就跟住人妻「惟明」入屋。雖然係啱啱認識，但人妻「惟明」就話第一次見識到香港嘅男人，仲大讚佢哋好精壯。
入到屋，急不及待坐底嘅細So見到一枱都係餸，仲有個疑似「人夫」喺度，即刻大嘆失望，軒仔就話：「我不嬲都話帶你嚟食住家菜，你唔好心邪先得㗎。」原來呢度一直都係教人妻點去煮餐好嘅住家飯，去箍住老公嘅心。一齊開餐時，細So就問人妻「惟明」同疑似人夫係咪結咗婚，佢哋就話唔係，原來二人只係工作夥伴，二人反問軒仔同細So係咪結咗婚？軒仔就即刻推開細So大嗌：「No、No、No！」不過細So就唔肯放過軒仔話：「我哋離咗婚。」嚇到軒仔擘大個口得個窿。
一場嚟到人妻廚房，梗係要學番啲撚手菜，軒仔就話想學燒玉子，人妻惟明就即刻開壇，軒仔負責打蛋同落鑊，人妻「惟明」就示範點煮，人妻「惟明」愈煮愈香，連平時唔食蛋嘅細So都忍唔住話：「真係好香，呢個真係好食。」捲咗三層，終於大公告成，雖然軒仔同細So講嘢多過做嘢，但點都要影番張靚相嘅......同人妻。
下集預告：「麻甩賣萌貼紙相」，麻甩加賣萌，真係好期待囉。
來源 source: http://nextplus.nextmedia.com
|
鍾意就快D Share啦！
|
|
|