你能想像過一年沒有手機的日子嗎？在這條戒毒村內，戒毒的人都不可以使用手機與外界溝通。Mark今年二十七歲，在美國讀書期間染上毒癮，回港後一次在街上被警察搜出藏毒，被法庭判感化令，進了基督教新生協會位於元朗的戒毒村，過了差不多一年與世隔絕的生活。
在進來戒毒村之前，Mark也是個機不離手的年輕人，「冇咗手機，唔慣之餘，我諗係有啲電話上癮，會有種不安、恐懼、焦慮嘅感覺。初初幾日已經咁不安，跟住心諗死啦，成年都冇電話用咪更加不安？」這裡沒有手機，沒有煙、酒，更加沒有毒品，一時間所有Mark依賴的物件全被拿走，他笑言：「想像唔到原來我要過咁嘅生活。」這裡的生活與他原來過的南轅北轍，「床又硬，地又爛，又熱，由朝熱到晚。初初我晚晚瞓覺前都會喊，覺得好委屈，成日諗住算啦，死就死，違反感化令都要偷走。」Mark輕輕撥走纏繞頸旁的蚊說。十一個月後的今天，他毒癮已脫，亦已適應了這裡的生活。他床邊的膠箱、窗台上放滿英文書，閒時翻翻書頁，重拾閱讀的興趣。
二十七歲的Mark濃眉大眼，驟眼看有幾分像蕭正楠，說話斯斯文文，不慍不火。十六歲會考後，他被家人送去美國讀書，Mark笑著自嘲:「但我有書唔讀，走去吸毒。」在美國留學期間，Mark結識到一群本地學生，染上吸毒惡習，最後連學位也沒有完成，「基本上冇乜點返學，花了三年時間喺嗰邊，主力都係吸毒。」年紀輕輕的Mark當時獨自留學，覺得不適應之餘，亦無法處理突如其來的自由，「因為細個屋企管教嚴，我咁大個仔第一次咁自由，我唔知道我可以做啲咩以前冇做過嘅嘢。」一次派對期間，同學向他遞上毒品，他好奇之下吸服了，自此就迷幻了他的青春。
「有心情返學就返，冇心情就走堂，去朋友屋企飲酒吸毒。」大麻、冰、可卡因、K仔、LSD，Mark都試過。「每日都食，甚至幾款溝埋食，有時食到冇錢食飯都要食」。他甚至說謊，騙家人給他學費用來買毒品。吃得最厲害的那些年，他記性衰退不少，「約咗朋友出街，我換換吓衫，都可以唔記得出街，gel gel吓頭，突然輕機咁，望住塊鏡諗，我做咩gel頭？然後停低，繼續玩電腦。」
面對生活中的孤獨，他以毒品來麻醉自己，逃避現實，「自己有時都會對自己好失望，明明去讀書又讀唔成，其實對自己好不滿。任何唔開心嘅事，再用呢個方法麻醉自己逃避。當你每次有唔順心嘅時候，又會覺得，吸多兩啖就會冇事，好快會過。」
吸毒後，他自覺無面目面對家人，一直沒有與家人聯絡。毒品給了他虛幻的快樂，卻拿走了他的友情、家庭關係。但他說，不會想吸毒拿走了他甚麽，「曾經吸過毒對我嚟講係一個經驗，係一堂課。」完成感化令後，他希望留在機構，幫助戒毒人士戒毒，「我希望可以用自己嘅經歷去做一個例子，或者係一個力量，俾多啲關心呢個群體。」
撰文：鄭靖而
攝影：王偉洪
來源 source: http://nextplus.nextmedia.com
|
鍾意就快D Share啦！
|
|
|