即睇全場入球精華：https://bit.ly/2JQHmXh
周六凌晨上演嘅世盃2018決賽周首場重量級大戰，由B組葡萄牙硬撼西班牙，戰況峰迴路轉激到爆！葡萄牙憑住首席球星基斯坦奴朗拿度連中三元，經歷兩度領先兼絕境扳平，最終以3比3戲劇性逼和有門將迪基亞「派膠」嘅西班牙，兩隊各得1分，球迷肯定睇到拍爛手掌！
賽前易帥改由希亞路領軍嘅西班牙，甫開賽便失守。開賽僅只2分15秒，葡萄牙隊長C朗拿度喺進攻左路扭入禁區，慘被西班牙守將拿祖費南迪斯踢跌，球證直指12碼，並由C朗親自操刀一針見血，僅3分半鐘就取得領先。C朗亦憑呢個入波，成為世盃史上第4位喺4屆世盃入波嘅球員。
失守後嘅西班牙之後不斷圍攻葡軍，去到24分鐘更憑一次長傳進攻，葡萄牙守將比比欲頭槌解圍之際，畀「迪哥」撞低，球證未有判罰，後者跟住搶走個波禁區邊以一敵二，人叢中冷靜射入，為西班牙追和1比1。
之後西班牙繼續控制形勢，只可惜艾斯高嘅離門25碼「窩利」中楣底彈落白界未能得手。大難不死嘅葡萄牙完半場前1分鐘憑C朗禁區邊勁射，西班牙門將迪基亞竟然犯錯「派膠」，將個波撲入龍門，葡萄牙半場驚險領先2比1。
換邊後西班牙全力反撲，更喺54分鐘靠迪亞高哥斯達近門撞入，取得個人今場第2個入波，追和2比2。得勢不饒人嘅「鬥牛國」，4分鐘後再有拿祖費南迪斯「將攻補過」，禁區邊射個「半窩利」世界波中內柱彈入，反超前3比2。
可惜，西班牙始終都帶唔到尾！葡萄牙喺完場前兩分鐘，憑C朗射入超靚罰球，完成帽子戲法，最終為葡萄牙逼和西班牙3比3，各得1分，場波超精彩，隨時係今屆賽事最精彩賽事之一。
即上彩報世盃專頁：http://win.on.cc/football/cup2018/
東網體育同你追實體壇每個精彩時刻！
https://goo.gl/ewVpvE
|
鍾意就快D Share啦！
|
|
|