娜姐周秀娜喺《宮心計2深宮計》正式登場，由陳煒同馬浚偉嘅鬥爭，轉為去到胡定欣同娜姐身上，胡定欣知道自己唔可以幫馬浚偉生仔，擔心娜姐會搶咗佢嘅地位，頻頻出招打擊娜姐，好似自編自導自演，扮唔小心整斷開榴百子之後，打傷自己嫁禍俾娜姐，結果馬浚偉一怒之下用近乎粗暴嘅方式，扯爛娜姐嘅衫而草草行房了事（新聞連結： https://bit.ly/2HHVekt ）。
因為劉心悠知道胡定欣嘅傷勢同娜姐無關，再加上佢為娜姐洗脫行刺呂珊嘅嫌疑，結果定欣覺得不滿，於乎是同韓馬利講，話不如收心悠做契女，之後代表大唐出嫁和親。喺下個禮拜一嗰集，心悠喺娜姐口中知道冊封公主嘅原因，於是佢走去向定欣求情，點知定欣堅持唔肯，結果心悠去搵蕭正楠哭訴。
蕭正楠知道之後，即刻同馬浚偉求情，點知講講吓馬國明亦都加入求情行列，最初馬浚偉以為係李龍基嘅提議，但係從各方人口中，知道呢件事原來係定欣搞出嚟，而且大家仲讚娜姐重情重義，所以佢走去質問定欣，最後知道定欣為咗一己私慾而出賣自己嘅朋友，搞到馬浚偉覺得好失望。
本來馬浚偉去藏書閣獨處冷靜，點知途中見到娜姐求天庇佑，心悠可以留在宮中同蕭正楠一齊，最終馬浚偉對娜姐改觀，仲齊齊返咗宮殿休息，定欣知道之後，即刻怒火中燒！今次個鏡頭再見唔到粗暴嘅畫面，反而見到馬浚偉從後溫柔咁攬實娜姐，再大特寫捉實佢隻手，同樣亦有唔少遐想。
娜姐噚日接受《蘋果》訪問，對於自己演出，佢話：「其實，好驚，呢啲宮廷劇對我嚟講係一個好大嘅挑戰，先要克服對白，最初真係有唔習慣，好彩之後嘅劇情都好順序，慢慢當咗自己係純熙，我覺得自己表現越嚟越好，我都希望觀眾可以鍾意。」
講到同馬浚偉嗰場「粗暴」行房戲，佢話：「只係意識上嘅嘢，不過拍嗰陣都有啲擔心，之後同馬仔、導演商量完之後，決定用畫面表達，喺合作過程一啲都冇尷尬，keep住溝通，成個過程好舒服。」至於故事嘅發展，娜姐話：「我同馬仔嘅感情越嚟越好睇，由唔信任同唔鍾意，變成唔係想像中嘅女仔，亦唔係太平公主嘅線眼，仲因為呢個原因，同姑姑嘅關係有變化，其他嘢等觀眾自己去發現！」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|