薛家燕二仔石耀庭（Jackson）今日小登科，今晚喺洲際酒店舉行婚宴，擺咗53圍，據知，過大禮嗰時，家燕姐送左家傳翡翠首飾畀新抱，有吊墜同耳環，由家燕姐婆婆傳到依家，而今晚酒席約2萬蚊圍，連總統套房約120萬，連佈置、禮服、酒水、金飾首飾，粗糙計算婚禮使費總共約300萬。
家燕姐縱橫演藝圈咁多年，一班昔日好友都嚟賀佢娶新抱Zoe，好似七公主今晚有五個會到，除咗馮寶寶喺馬來西亞嚟唔到之外，好似蕭芳芳、王愛明、陳寶珠、馮素波及沈芝華。仲有好拍檔黎小田，還有一班《真情》演員都會嚟，至於其他賓客有修哥胡楓、吳君麗、奚秀蘭、汪明荃、蔡和平夫婦、鄭明明、陳曼娜、朱明銳、王梓軒同父母、雪妮同唐佳夫婦、夏春秋同太太、歐陽震華夫婦、楊怡、胡杏兒、阮兆祥、曾航生、米雪、車沅沅、湯寶如、于洋、徐小明、鄧兆尊、李琳琳、Joe Junior同太太等。
五公主接受訪問時，芳芳姐就話︰「今日好開心嚟飲新抱茶。」而寶珠姐就話做姨媽好開心，沈芝華同王愛明都表示︰「我哋升咗級係做奶奶。」問到送咩禮物畀一對新人，馮素波笑謂︰「我唔話你知。」
家燕話噚晚開心到瞓唔着，寶珠姐話︰「我哋都瞓唔着。」問到有冇見過家燕姐新抱？佢哋異口同聲話未見過，馮素波就話：「睇住Jackson出世同長大，最唔同就係佢嘅身形，以前係肥仔。」問到送咩祝福？芳芳姐送永結同心，寶珠姐話白頭到老、連生貴子，沈芝華話百年好合，而王愛明送永遠恩愛，馮素波話要孝順家燕，一家和睦。問到想新抱生幾多個孫，馮素波就話要趕住上去飲新抱茶。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|