藝人薛家燕兒子石耀庭和女友陳素怡今日結婚，傍晚時分，身穿紅金色珠片低胸晚裝的薛家燕現身受訪，問有沒有訓示給仔仔和新抱？薛家燕說：「我同個仔講，最緊要愛錫老婆，佢都好乖，要繼續生性，兩公婆要容忍，錫多啲老婆，新抱好錫我個仔，好細心，個仔好有福氣。（想唔想快啲抱孫？）你哋都周圍講緊。（一串六隻金豬係咪有寄語？）新抱都唔明乜嘢意思，我聽老人家講，買一排豬可以生多啲，但其實一、兩個都OK。」薛家燕與新抱全天的行頭都非常亮眼，但薛家燕拒絕透露花了幾多錢，只謂：「最緊要靚就得！」
感觸眼紅紅
榮升奶奶的薛家燕心情勁靚，笑言自己前一晚只睡了兩粒鐘：「心情好興奮，今朝四、五點先瞓，七點鐘就彈起身，平時鬧鐘響會賴床，但今日冇，因為係我同我個仔嘅大喜日子，個仔娶老婆，真係期待咗好耐。」談到最感觸之處，薛家燕眼紅紅地說：「今朝接新娘，佢哋斟茶畀我嘅時候，都已經好感觸，終於等到今日，下午佢哋簽字、宣讀誓詞嘅時候，開心到喜極而泣，但我叫自己要控制情緒，不過，見到親家都喊緊，可能做父母都係咁，對仔女長大成人都會好有感覺。」
對新抱讚不絕口
至於對新抱仔的評價，她即讚不絕口：「個仔同新抱好登對，佢好識揀老婆，新抱好靚、好賢淑，知書識禮。（今晚會有乜嘢賓客？）有好多嘉賓都會飛返嚟，但有啲都唔知嚟唔嚟到，所以下午都安排緊啲坐位。（七公主會嚟齊嗎？）馮寶寶嚟唔到，佢喺馬來西亞，蕭芳芳、陳寶珠、馮素波同埋王愛明會嚟，沈芝華都特登喺美國返嚟，仲有羅艷卿、吳君麗、王祖藍，同埋環遊緊世界嘅陳百祥都會嚟，以前拍《真情》嘅同事同無綫高層曾勵珍都嚟，佢哋話都一定要到，因為睇住我個仔大。（有冇為個仔結婚減肥呀？）冇減，但設計師話我瘦咗。（今晚着幾套衫？）我同新娘都係五套，原本兩套，但造咗唔好嘥！」
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|