1993年6月30日，是香港Band壇最傷痛的日子，搖滾班霸Beyond的靈魂人物黃家駒，在日本拍遊戲節目時意外從高台墮下，結束了31年的短暫人生。今天是家駒離世25周年，胞弟黃家強依然思念，日前接受《蘋果》電話訪問，細數與家駒的點滴，家強嘆道：「今年喺北京為家駒做蠟像，還了我心願，今年25年，感受對我來講不是時間長短問題，佢喺我心目中地位好重要，咁多年都有同佢傾偈，佢一直喺我身邊。」曾替Beyond做助手的龔建忠（阿龔），日前亦帶《蘋果》到家駒成長地蘇屋邨、經常去的酒吧、二樓後座band房及廣播道，細說家駒那些年舊日的足迹。
採訪：余燕儀、王連連
攝影：郭賢興、林德雄
【逝去日子】蘇屋邨成長地
在蘇屋邨長大的家駒，以前跟家強及其他家人同住茶花樓，家強憶述兩人小時候在蘇屋邨後山煨番薯、游水及捉草蜢：「我哋兩兄弟喺度長大，屋邨有個山頭，成日上去煨番薯、捉草蜢，仲去水塘游水，其實都幾危險，但呢啲係唔使錢嘅娛樂，有好多回憶。」
身為助手的阿龔放工會陪家駒返屋企，路上通常都會路經附近的鐵皮屋，阿龔說：「佢通常返屋企前就會叫司機停車，喺鐵皮屋買糖水返屋企食。」家駒身上不時會有不少飾物，阿龔指原來家駒屋企會有好多私伙飾物，耳環、戒指、頸鏈一大堆：「總之佢出門口前一定要搞一大輪啦，佢好貪靚，左襯右襯先出門口，呢個襯飾物環節一定有。」
【光輝歲月】二樓後座
二樓後座是Beyond的大本營，練歌、夾band、錄demo等都在band房，有時到三更半夜，家強笑說：「最記得由一間細細嘅房，趕走晒啲住客，畀我哋霸晒嘅過程，佢哋投訴我哋夾band嘈，但地方係阿榮嘅，住客有乜理由投訴包租公，雖然係阿榮嫲嫲租落畀住客，當年有好多住客，分租畀一個大家庭，另外仲有單身人士，阿榮攞咗兩個房，一間佢自己瞓，一間畀我哋練歌，俾人投訴時通常我哋冇出聲，由阿榮搞掂，差佬嚟時我哋咪停囉。」
俾面派對
除了他們四子，二樓後座到後期也越來越多人，家強續說：「因為當時收入唔穩定，所以我哋教學生結他，每人都有收學生，學生又帶朋友嚟，後期band房好多人，家駒會話『不如去紅館空地玩。』大家夜麻麻就走去打排球，因為二樓後座太細，佢好鍾意搞集體活動，好鍾意帶我哋去長沙宿營。」
Beyond四子合作多年，少不免有磨擦，家駒甚少發嬲，也會是最終決定者，阿龔指85年在堅道明愛中心自資舉辦「永遠等待演唱會」，家駒全都親力親為：「印海報、夜晚喺彌敦道貼海報、諗宣傳，佢都一手一腳做。」
【午夜怨曲】尖嘴蒲到蘇豪
曾擔任黃家駒助手的龔建忠日前接受本報記者專訪，他指家駒才是「吹神」元祖，放工後會去幾間的士高、酒吧，轉幾次場跟朋友傾偈。家駒由尖沙嘴廣東道的Hot Gossip玩到新世界中心的Catwalk，之後會再轉場到中環，有很多明星也去開派對的97吧、64吧，最尾一站通常是位於雲咸街的蘇豪。家強笑說家駒喜歡蒲：「一班朋友去飲酒傾偈，但家駒唔飲酒㗎，只係叫可樂，佢唔鍾意醉嘅感覺，覺得醉咗嘅人好樣衰，所以佢話唔想醉，哈哈！」
阿龔說：「家駒鍾意同人傾偈，乜都傾得一餐，佢有興趣嘅事就會不斷追問。有句說話形容佢：『家和萬事興，家駒口不停。』」
【無聲的告別】廣播道最後音樂會
排山倒海的工作，Beyond好多時候在廣播道出現：商台、港台、電視台幾邊走，顛倒日夜不斷做，家駒都沒埋怨，家強笑說：「記得嗰時喺無綫化妝間，我哋四個一齊，冇乜理其他藝人，張學友走埋嚟問我哋成日見，點解仲咁多嘢講？可能我哋玩band另類，所以冇乜同其他藝人傾偈，之後耐咗，我哋都有同其他藝人傾偈，冇咁另類，同王菲坐埋一張枱食飯，家駒都有主動走去同其他人傾偈，佢同杜德偉、黃耀明好好傾。」阿龔大爆家駒毛病是懶瞓，好難叫得醒他。Beyond曾於93年5月初在港台舉辦「Beyond我哋呀！Unplugged音樂會」，這亦是家駒在港最後一次音樂會，成為與香港歌迷的訣別演出。
|
鍾意就快D Share啦！
|
|
|
