柏豪忽然嚟個爆料，好在超蓮都招架得住！
歌手周柏豪出席活動，期間被主持人問到現實生活中不為人知嘅一面，佢自爆：「雖然平時係個宅男，但有時都好大男人，尤其係做重要決定嘅時候，我會好主觀咁爭住話事。」同場仲有何家千金何超蓮，佢同好友柏豪齊齊接受訪問。講到早前齊齊為女士化妝品拍攝廣告，柏豪表示好開心受邀，指會以欣賞女性嘅角度出發，仲乘機幫超蓮開設嘅食店宣傳：「我特別欣賞啲識做生意嘅女仔，之前去超蓮舖頭幫襯，啲嘢好好食，而且仲招呼好好，要大小姐親自拎碗麵畀我。」
柏豪爆超蓮多筍盤
問到有冇介紹男仔畀超蓮，柏豪即大爆對方身邊不乏筍盤：「佢身邊大把啦，之前生日會我見都有好多男性朋友，我諗佢煩點揀多過煩冇拖拍。」至於講到被細佬猷啟爬頭結婚，超蓮表示：「都冇話爬唔爬頭，始終男同女唔同，依家都唔心急拍拖嘅。」
另外，講到柏豪身形keep住大隻，佢指初初識太太嘅時候比較瘦削，依家大隻咗，反而畀太太抱怨指雙手攬唔晒。超蓮則指都鍾意男仔有少少肌肉，但唔好太大隻，適可而止就夠。
來源 source: http://hk.on.cc
|
鍾意就快D Share啦！
|
|
|
