雖然樹大好遮蔭，但離開大台唔等於無景，反而大把機會，撈到出頭做男一。
講緊嘅係昔日《愛回家》阿登羅天池！15年佢唔撈大台後，憑住一副打得身手，北上搵出路，武指演員兩瓣兼，肯博肯捱冇話搵唔到食，近日一套網大電影《命運老虎機》，佢做男一兼監製同動作指導。
呢套戲除咗佢，仲有即將唔係大台親生仔嘅張達倫，都係男主角。
戲裡一班核心演員，其實唔少都係大台嘅三四線演員。不過跳出膠劇，一班綠葉完全脫胎換骨咁，唔再演專業戶角色，有戲味好多。
就好似羅天池之前又係做男一，主演另一套嘅《極限拯救》，當中有走咗年幾嘅朱璇演出，估唔到離開大台後，唔使再做小三或邪牌嘅佢，演技大躍進。
講番羅天池，當日唔同大台續約，除咗人工低，身手好嘅佢冇發揮之地亦係主要原因所以寧棄膠劇跳出去搏一舖，終於俾佢搏到。羅天池回應：「出到去大海，手停口停冇底薪，所以要更加再努力，有這個機遇算是不錯，現在做武指，演員，起碼多方面發展多了，以前只做一樣，試了才發現自己原來可以有更大的發展。應該這樣說，發掘無限個可能給自己，在每一個行業如是！」
來源 source: http://nextplus.nextmedia.com
|
鍾意就快D Share啦！
|
|
|
