多得「七年之癢」帶古巨基回歸Long Time No See嘅紅館舞台，開五場演唱會止痕，點知就發生「墮基」意外，差啲一失足成千「古」恨，跌落舞台機關大咕窿，直插兩米深台底，好在福大命大，只係扭傷咗肩頸位肌肉，佢十零分鐘就執番個魂魄，彈番上台再開騷， 「傷椎人」認真犀飛利！
唔係黑心口臭，墮台唔同行街PK咁小兒科，大吉利是講句，大鑊嘢有黃家駒事件， 細鑊啲都有林子祥、蔡一智同樣跌親，不過一個傷到聽力大減，一個就「燉」親條大陣要休養成個月。但因乜解究，平時大熱天時都着長袖衫、褲，驚入風嘅基仔，個傷竟然可以好得快過光速？唔通佢喺衫入面攝咗鋼板，定係打咗石膏護體？計我Nuts哥話，係就有板有膏，不過就係龜板同苓膏，呢次基仔「唔跌唔知身體好」，真係要多謝古太Lorraine 。
黃奕嗒五阿哥糖
皆因古太娘家開涼茶舖賣龜苓膏馳名， 斷估基仔食得多「威而鋼版龜苓膏」先有如此神奇功效。古太今次助老公旺血生肌、補腎健骨、養顏提神、驅風祛濕……即係「有病醫病，冇病強身」嗰種，相信基仔應該有外敷埋，否則成45歲人，個樣長期保鮮，畀人話佢同18歲時嘅孫中山撞樣，連𡃁仔情迷嘅電玩人物「火龍果龍蝦」同「七夕青鳥」造型，都成功Carry上身先叫勁。正所謂有諸內形諸外，多得Lorraine嘅龜苓膏，將「驅風祛濕」推到另一層次，令基仔入行27年， 由頭到腳正氣過條黨參，縱橫內地、台灣多年，都克守「夫」道保「貞操」，力抗天下男人都會犯嘅錯－－「鹹濕」，次次都KO邪花埋身，緋聞近乎零，唯一一單就係同內地女星黃奕拍《還珠格格3》時，傳演「五阿哥」的基仔及「小燕子」黃奕日久生情。黃奕女追男嗒糖示愛話「喜歡古巨基」，只不過要破呢個「緋聞處男基」之齋缽，難過打工仔買車位。
屋邨仔身家過億
講起基仔嗰位拍咗20年拖先結婚嘅Lorraine，如果佢唔做基仔位「CEO」，一定係股壇狙擊手中嘅狙擊手，佢眼光獨到真係超乎想像，記得基仔出道時，只係家住沙田嘅屋邨仔，喺無綫做個綜藝節目《娛樂新聞眼》嘅小主持，冇錢途冇後台，只係一條有理想嘅鹹魚，好在鹹魚都有機會翻生，基仔簽咗唱片公司後，就畀識貨之人Lorraine睇中，一早知基仔係「潛力股」， 即時趁低吸納做佢助手，仲重本投資為基仔打江山，果然長揸有回報，家陣基仔有舖、有樓、有公司，身家過億，Lorraine榮升星級老闆娘，基仔墮台後曾經講過「大難不死，必有後福」， 其實佢嘅福將一早已經遇上。
|
鍾意就快D Share啦！
|
|
|
