陳淑蘭今日喺尖沙嘴帝樂文娜公館舉行50歲生日會，主題喺「半個世紀．仲玩得起」，而大會顏色主打金色。間酒店係蘭子男友利承武主場，自然要問下利公子會唔會親身駕臨賀壽。不過蘭子接受傳媒訪問時，一聽見「利先生」三個字就封口，只稱：「冇嘢講呀！」話口未完又忍唔住好開心咁「甜笑」：「呢度咁大支持，多謝晒。」即係暗示係利先生借地方俾佢搞生日會啦。
當再問到係咪免費俾個場佢用時，蘭子又再封口：「唔好再進一步講喇，講到我口都窒埋。」
踏入五十歲，咁大件事，利承武私下有冇同你慶祝？蘭子只答「唔係」。頭先蘭子提到自己「五十而知天命」，佢解釋話係同個天講，而唔係同記者講。
問到係咪想步入人生另一階段？蘭子話步入邊個階段大家都唔知。至於係咪問咪神神秘秘（結婚）冇講，佢就話：「係呀，女人好多私己好多私密，我好幸福，好多朋友撐我，總之我感受到好多唔同類型嘅愛，媽咪同我講今晚想飲香檳呀，最開心50歲仲有媽咪陪住我，覺得好開心同滿足。」
講來講去兜咗成個花園，係咪都係唔答感情事？蘭子話：「係，因為繼續講係冇止境，製造好多麻煩。總之大家見到乜就係乜，見唔到就冇嘢發生。」講到早前同Crystal嘅爭拗，係咪已經放低？佢話：「人生有好多事去學習成長，過咗就過咗，之後要行第二第三步。」問到利生係咪支持？佢話：「撐、支持同錫囉。我好多朋友都係咁，好開心。」
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|
