夏日炎炎，最好落水同陽光玩遊戲，近年在圈中流行玩Wakeboard，當中的佼佼者，莫過於陳嘉寶（Anjaylia）的老公黃頌祈（Epaphras，簡稱EP）。今年37歲的EP，有「長洲彭于晏」外號，自小在長洲長大，擅長習水，任何水上運動都難不到他，全因他是滑水健將，曾在本地和國際賽事中奪獎。早於十年前他已取得滑水教練牌，又是裁判，更是香港滑水隊總會纜繩滑水分部副主席。最近他經常教老婆的好友玩滑水，如蔡思貝、陳瀅、何雁詩等。
日前EP在大埔，駕駛住價值160萬的Nautique游艇出海接受《蘋果》專訪，還親自落水，示範了幾招花式滑水。自小對住海成長，EP笑言爸爸將他掟落水中學游水，他說︰「2、3歲就掟落水，當然有救生衣，嗰時太細，見我游唔到就即刻拉我上嚟，唔會由我自生自滅，不過原來都work work地，習慣幾次就學識。（將來你嘅仔女，你會唔會咁樣教游水？）唔得，依家會俾人投訴。」
談到老婆Anjaylia自嘲是「防水」，EP說︰「其實佢因為工作上唔曬得，佢唔係防水，我都有教過佢滑水，不過好少，一、兩次，可能佢細個學游水時嚇親，依家徵求一位靚仔教練教佢游水，（點解你自己唔教？）我唔擅長，而且兩夫妻教，佢會冇咁專心，留番畀靚仔教。」
本身任職金融界的EP，每次都會親自駕駛游艇出海滑水，他邊開船邊手持iPad，睇住股市走勢，他說︰「因為工作壓力好大，我幾鍾意自己開船，感覺好靜。」而他駕駛的游艇，亦十分先進，他說︰「呢架船可以用手錶嚟遙控，製做出嚟嘅浪，高低大細都可以控制到，而且啲浪好靚。」
有家底，又是金融才俊，加上是滑水教練，問EP是否經常有飛來蜢埋身？他笑言︰「人哋feel到你嘅氣場，係專心做嘢，唔係有空間畀大家發生任何嘢。我老婆對我好有信心，我又好檢點，唔會有任何溝通上嘅誤會，而且佢EQ好高，我係個性急冇耐性嘅人，而佢就好有耐心慢慢傾，所以我哋好少拗撬。」
EP原來少年時拍過不少廣告，如快餐店、服裝店、飲品等，差一步便入行做娛樂圈，他說︰「個時拍咗好多廣告，差不多去到拍電影，屋企人唔想我入行，所以冇入到，繼續讀書。」
採訪︰羅婉玲
攝錄︰廖達燊
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
