許靖韻，可能你唔認識。
畀啲貼士，佢舊年唔見樣着「小背心」獻聲，好多人聽到畀like。其實小背心就係25歲英皇歌手許靖韻，佢10年參加英皇新秀歌唱大賽進入三強，13年簽約英皇娛樂，計吓數，出道已經8年，仲先後出過《Angela》、《R U OK?》同《大個之後》三張唱片。
英皇老闆楊受成經常掛嘴邊讚許靖韻：「佢把聲係好聽，如果佢生於祖兒年代，佢紅咗啦。」藝人好講天時地利人和。
對於老闆咁讚，許靖韻感恩：「佢成日都咁講，講呢啲嘢。」許靖韻冇抱怨生不逢時，「每一個年代都有每一個年代嘅做法，我覺得我喺呢個年代都唔錯嘅，有好多唔同資訊可以得到，可以有更加大嘅進步空間，可以睇到唔同國家嘅音樂文化，學到同用到喺自己音樂上，生於呢個年代都好幸福。」
許靖韻知足，佢覺得呢個年代資訊發達，未嘗唔好。正因資訊太發達，網絡訊息太快，樂壇冇人買蹀，變得一池死水。許靖韻看得開，「依家搵錢方向唔同，以前靠賣專輯去搵錢，依家多咗網絡世界搵錢，又有唔同活動度去搵錢。」
出道已8年嘅許靖韻，根本搵唔到食，佢直認經濟情況唔好。「其實一路都唔OK，我希望今年可以好啲。」許靖韻讀中六時參加英皇搞嘅歌唱大賽，畢業後考入香港浸會大學財務系，半工讀做窮學生。「我中六簽咗英皇，我一路以嚟，讀大學有教琴維持自己生活，大學中間出咗第二隻專輯，但反應麻麻，係咪大家唔係咁鍾意我，嗰年我出完專輯，完全停咗一年冇幕前活動，又停晒歌舞演出，零收入。」
「嗰年自己覺得最難捱，有諗過要轉行，我仲有一年就大學畢業，媽咪有問我 主修Finance，畢咗業後係咪會做番Finance啲嘢，我自己諗，唔做呢行，一切穩定好多，假期又stable，好多嘢會有預算。我有諗退出，因為覺得冇機會，自己嘅歌冇人聽，我唱過嘅作品好唔啱我，又好多人比我好，自己冇運，加埋咁多原因，算把啦。畢竟做呢行冇預算、冇安全感，要等機會。但我又諗如果揀咗做金融，10年後睇番，我會後悔，會問自己當時有機會點解唔去試？」許靖韻最後揀留下追夢。
零工開，零收入嗰年，許靖韻堅持唔放棄，佢付出更多，「嗰年我搵咗好多唔同音樂人同我寫歌，自己又寫咗好多歌，跟住我同公司講，我真係好有心，好想繼續做音樂，公司就喺我畢業嗰年，決定再畀我音樂作品。」窮到燶，許靖韻藉着係出過碟新人之名去教琴，亦有兼職同人補習，維持生活。許靖韻金融卻不擅理財：「我發現啲錢使得好快，一搵就使晒，我要交學費，仲有學唱歌，又買吓衫，我有10蚊會使咗8、9蚊，倒水咁，媽咪冇要求我畀家用，佢見我窮，知我唔掂喎，會問我夠唔夠錢使，但我通常會叫媽咪唔使擔心。」
迷惘嗰一年，許靖韻入不敷支，最後決定問英皇借錢，「還好公司肯借錢畀我，我前前後加埋都借咗有6位數字。之後做嘢，慢慢都還番晒。」許靖韻早前公司安排返內地參加真人騷《創造101》，佢雖然排名第19名踢走咗。佢呢次參加節目，喺內地打開知名度，多咗機會賺人仔：「乜嘢節目，只要認識到我聲音，我都想去試。」
許靖韻算係英皇「資深新人」，佢當然都想有一日似大師姐容祖兒成為天后：「好希望有佢成績一半都好，大家可能唔知，我入咗公司都8年，冇話要畀自己幾多年一定要做到佢咁嘅成績。依家我仲係2字頭，希望3字頭前可以有少少成績。」依家25歲嘅許靖韻準備再投放5年時間，「5年後，我都踏入人生比較成熟啲階段，好多嘢要諗下屋企，唔可以只係顧自己，2字頭仲有青春，仲有時間追求自己夢想。我等緊一隻hit歌，我知可遇不可求，等人寫畀我，或自己寫畀自己。」
許靖韻從不怨天尤人，佢話：「有咁嘅經歷對我係好，打咗個底，如果day 1入到嚟就好紅，我未必有進步空間，多謝以往經歷令自己成長，一首歌成名，我可能只係唱嗰類歌。」許靖韻話沒歌唱demo，多得師弟羅力威送佢一首創作歌，為佢打氣。
或者有人只叫出許靖韻做「小背心」，佢話一啲都唔介意，「好多人識『小背心』，證明佢係非常有heart歌手，有時叫花名仲親切。」訪問當日，許靖韻都着咗白色背心裙，佢絕對情有獨鍾小背心：「我屋企有大量小背心，我怕熱，夏天會勁買，起碼有過百件，我冇乜嘢可以露，咪露吓手臂。」
撰文：陳杰
攝影：林德雄
攝錄：廖達燊
髮型：Veron@Hair Corner
化妝：Khaki Yan
服裝：Talulah
場地：海利公館
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
