無綫花旦李佳芯由「御用小三」變成近期演技令人另眼相看的「港媽」，演技大躍進，雖然拍劇起步較遲，但勝在後勁凌厲，不過她透露試過無法駕馭角色，匿埋爆喊。
從良百變演技爆發
李佳芯（Ali）未加入無綫前在有線主持節目，至2012年她以30歲「高齡」加入無綫由頭做起。雖然起步遲，但短短六年間已經由閒角「升呢」女一。由於她樣子銷魂，拍劇初期經常被安排飾演情婦角色，連古裝劇《倩女喜相逢》亦飾演九尾狐，故有無綫「御用小三」之稱。
隨着演技大躍進，近年Ali演的角色開始百變及「從良」，劇集《踩過界》的夜蒲法官、去年台慶劇《誇世代》的刁蠻大小姐Paris，以至近期《BB來了》的港媽，盡情發揮其可塑性。
BB來了不敢想像
Ali於《BB來了》飾演新手媽媽，演出「貼地」，帶出初為人母、夫妻、婆媳矛盾的家庭問題，觀眾看得有共鳴，大讚她演得好，被熱捧有望爭視后。她說：「今次某程度都係唔討好嘅角色，睇番都覺得好煩，成日大吵大鬧、家嘈屋閉，但目的係要帶出家庭嘅現實問題。拍嗰陣又嗌交、又發癲、又喊，拍得好攰，好彩出嚟觀眾鍾意，覺得夠貼地。」
劇中經常與BB有對手戲的Ali透露，表兄弟姊妹輪住出世，故經常與BB相處，但拍劇卻是兩回事：「今次拍劇感覺好似生咗一胎咁，除咗冇陣痛之外，因為戴住唔同嘅假肚，由冇到抱住個真BB，已經感受到責任巨大，諗到要供書教學同責任更加不敢想像。」
工作冇停唔諗生仔
劇組上下疼錫BB，但Ali笑言由期待變成有陰影：「初時會幻想第日生咗就係咁，但拍到中後期真係驚咗，自己代入咗角色感覺責任好大，要生、要養一個小朋友唔容易，演阿媽先發現母愛偉大。」與男友陳炳銓感情穩定的她坦言以前有生BB的念頭，不過現時工作太忙，不敢多想：「以前成日諗幾時結婚、生仔，依家真係冇，呢幾年工作冇停，劇接劇，都唔會有時間去諗，或者應該話唔敢去諗。不過時間上係有心唔怕遲嘅，生兒育女順其自然，真係冇都冇辦法，身邊有朋友45歲先第一胎。」
遇好前輩從中偷師
Ali坦言拍劇初期因為對角色無從入手，試過匿埋喊：「初期多數做小三、情婦、奸角、搶人男友嘅功能性角色，角色當然唔討好，九成九都係出嚟被人鬧，人身攻擊都試過，但都證明觀眾睇得投入，睇到人哋嘅批評，對我嚟講係動力。有時會遇到啲角色唔知點演，開工頭一、兩個星期都未駕馭到，真係試過匿埋喊，因為真係唔識做、演唔到，出到嚟又達唔到心目中嘅效果。」
不是科班出身的Ali靠實戰累積經驗，邊拍邊學。她笑說：「我個樣同年紀都成熟啲，好好彩反而一路嘅對手都係前輩，好似岳華、黎耀祥、陳豪、吳岱融、方中信同廖啟智等，演技係要時間去浸，好多嘢冇經歷過真係唔識演。我當自己係海綿，不停咁向佢哋學習吸收，喺佢哋身上學習咩叫做演戲。」去年她趁空檔跟老師上堂進修戲劇，彌補不足。
服裝：Max Mara
首飾：Links of London
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
