十月懷胎不簡單，37歲的董敏莉（Monie）與老公莊耀金結婚兩年，上月公佈懷孕四個月。Monie表示第一次產檢時，發現有子宮肌瘤跟BB共存，一度非常擔心，由於肌瘤位置近產道，醫生暫不建議她順產，只能靜觀其變。Monie現時每天保持開朗心情安胎，期待年底見到小寶寶，由於肚子變大，腰痠背痛，她更去學孕媽瑜伽紓緩筋骨。
董敏莉前年嫁律師老公莊耀金，上月自爆有「第三者」，現陀B約五個多月，預產期在今年12月。由於肚子逐漸變大，令她腰痠背痛，甚至出現腳抽筋情況，距離「卸貨」至少還有四個月，Monie決定向瑜伽導師如楓拜師，學幾招大肚瑜伽紓緩筋骨。訪問當日，導師見Monie是初學者，只教她貓式、扭轉式、戰士式和樹式等入門動作，由於難度不高，Monie輕鬆做到。
Monie談到陀B情況，她表示早前跟老公及家人去大阪babymoon旅行：「啱啱去完大阪旅行，行好多街，腳有啲腫，我又唔敢搽按摩膏，休息為主。有時腳會少少抽筋，可能啲筋緊啲，老公有同我『鍊』吓。」雖然首次懷孕，但Monie知道孕婦情緒好重要：「我每日都好開心，仲買咗BB心跳機，平日一周聽一、兩次，但去旅行會擔心啲，每日都聽。每日都同BB傾偈，去景點、出街都同佢講。BB喺20周已識聽嘢，佢開始接收聲音，我都有播歌佢聽，今日嚟訪問做瑜伽，我都有同BB講。」
初孕嘔吐勁
暗示生女的Monie，仍未感覺到BB在肚中踢動，她說：「反而有彈吓彈吓，可能佢仲好細隻，未有話胎動，遲啲先會，醫生話佢𠵱家喺我肚中游水。」Monie指初孕嘔吐犀利：「又嘔又食唔到，瞓唔好，𠵱家情況穩定番，初初有幾個月我停晒冇做運動，成日瞓，𠵱家BB開始大，人會易攰，頸開始緊，所以今日做吓瑜伽，拉吓筋係好啲，我都會盡量keep住做吓。」
BB的預產期在12月初，Monie仍未決定剖腹還是順產：「第一次產檢，醫生話發現我有子宮肌瘤，位置近產道，可能冇得揀順產，但醫生話有機會會改變，可以遲啲先決定。𠵱家每次產檢，都會睇吓肌瘤大細，暫時BB喺上面，肌瘤喺下面，唔會影響大家。開頭知道子宮有個肌瘤，我都驚，我有上網睇肌瘤對BB有乜嘢影響，好彩位置唔影響，只影響生產方法，都OK。」
老公剪臍帶
老公早答應陪入產房打氣，Monie說：「佢要剪臍帶。」不少剪過臍帶的星爸都形容似「剪豬腸」，Monie說：「佢未練，佢有問我，我都聽講唔容易剪。」問Monie還會再生嗎？她說：「生咗呢個先，呢幾個月以嚟每日都有唔同感覺，係開心嘅，但唔同階段，去產檢時都有唔同嘅擔心，生咗一個先再諗。媽咪已經催定我再生，心急過我。」
身形瘦瘦的Monie肚子不算大，她表示只重了約5、6磅，是正常標準：「之前成日嘔，體重輕咗，呢排有番胃口，體重先追番，陀B後胃口變咗，我鍾意食皺皮瓜同水果。」Monie笑言兩夫婦已用公仔模擬真B練習換尿片和抱抱。
撰文：陳杰
攝影：沈建程
服裝提供：Fila
場地提供：eliment FitLax（V-Point）
【婦女常見子宮肌瘤】
陀B的董敏莉，產檢時發現俗稱「纖維瘤」的子宮肌瘤，是婦女常見的疾病，通常屬於良性。患者大多是做例行檢查時發現子宮脹大，又或者懷孕時接受超聲波檢查而發現。
子宮肌瘤成因不明，有研究顯示與女性荷爾蒙雌激素分泌有關，例如服用含有雌激素藥物、肥胖、壓力等影響，均有機會增加患病風險。子宮肌瘤不一定要立即切除，可選擇觀察、藥物緩和症狀、荷爾蒙療法或利用較新的「子宮動脈栓塞手術」等方法治療。
|
鍾意就快D Share啦！
|
|
|