台灣綜藝天王吳宗憲嘅19歲仔鹿希派（原名：吳睿軒）前日喺Ig嘅限時動態貼出「女友生病，要是沒好起來，我就做炸彈，炸台北市政府，全民賠罪。」嘅恐嚇言論，引發軒然大波。言論已觸犯《刑法》恐嚇公眾罪，可能面臨兩年以下有期徒刑，事情發生後吳睿軒已配合警察調查。
父子鞠躬道歉
噚日吳宗憲同兒子舉行記者會並且公開道歉，吳宗憲先出場，面色凝重道歉話：「非常抱歉，這個事情我是跟他講要當個男人，19歲多，生日過了就20歲了嘛，自己要去扛這些事情……人生又不是活到19歲就結束，後面日子還很多，應該要學會怎麼應對這些。」出道只有23日就闖大禍，吳宗憲代兒子宣佈離開演藝圈：「藝能界不需要你這樣的人，最不能原諒的過錯就是愚蠢。你算倒楣，因為你爸爸就是吳宗憲。然後看你以後要去澳洲、歐洲哪裏打工，爸爸就送你到這裏，你可以回去準備行李。」吳睿軒嘅祖母以「家醜」形容事件。
兩父子當眾鞠躬道歉，喺20分鐘嘅記者會中吳宗憲不時眼泛淚光。
吳睿軒目前喺美國波士頓伯克利音樂學院讀書，問到會唔會擔心影響學業，佢話會同校方好好解釋，如果因為荒謬嘅行為而受罰，無論係罰款或者勞動服務，甚至被拉都會接受。吳睿軒話家教令佢明白做咗白癡事就要去承擔責任，佢解釋當時係同朋友之間嘅玩笑，只係抱住貪玩同講一個只有朋友間先明嘅笑話，知道出事後已經第一時間去咗警署落口供同解釋。
撰文：馮仁昭
|
鍾意就快D Share啦！
|
|
|