晨早起床清新開朗，唔少老人家都習慣晨完運，再去酒樓嘆翻杯茶，食個包，呢種生活確係爽呀！不過，因乜解究，呢位阿伯晨咁早就躁底，仲搞到同酒樓阿姐互掟茶壺，同場一班老人家真係巧驚驚呀！
呢間位於沙田禾輋邨商場嘅酒樓，尋日(周三)朝早7點幾，早市已經坐滿人，但畫面上方嘅一位光頭四眼阿伯，唔知因乜同酒樓阿姐嘈起黎，由酒樓前員工提供嘅閉路電視片段睇到，事發時係7點43分左右，阿姐同位光頭阿伯講到好勞氣，仲手指指，而嗰位光頭阿伯應該係一個人黎，同一位阿姐搭枱坐，嘈嘈吓，光頭阿伯首先發爛拎起茶杯掟向阿姐，阿姐亦不甘示弱，快手咁拎起另一個杯，將茶潑向對方，拿，大戰正式開始！
附近茶客爭相走避，就咁你掟我，我掟你，光頭阿伯最終竟然擸起茶壺向阿姐個頭扑埋去，一時間，茶壺變咗武器，喺場內亂飛，呢個時候，一位黃衣熱心阿叔行埋去從後抱住光頭阿叔，酒樓一位「架兩」阿姐亦加入勸交，光頭阿叔一度想擸櫈掟人，好彩熱心男拉住咋，而阿姐就乘機走人，但「架兩」阿姐講講吓竟然激動起上黎，加入戰團，仲起腳踢光頭阿叔！媽啊！好亂啊！
畀兩個女人打，光頭阿叔激到爆炸，喺地下拎起茶壺繼續發動攻勢，狠狠哋兜頭扑落「架兩」阿姐，之後就氣沖沖咁行埋一邊，大戰結束，一班茶客睇到呆晒，真係嚇都嚇飽！
警方表示，一名姓歐(63歲)男子，與姓朱(44歲)及姓藍(50歲)酒樓女職員發生爭執，案件列作刑毀處理，暫未有人被捕。酒樓姓葉負責人指不清楚事件經過，不便評論，而兩名女職員今早未有上班、正在休息。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
| | | |
|
鍾意就快D Share啦！
|
|
|