今日係七夕，康仔喺度祝各位戀人甜甜蜜蜜，並希望一眾單身人士快啲搵到另一半。
早喺上個月，大大小小嘅speed dating公司已經打正七夕牌頭搞event，可能因為佳節效應，反應都幾熱烈，唔少event都爆晒場，仲畀康仔遇到一位入職以嚟見過最怪嘅客！
葉小姐係畫室助教，上嚟報名嗰陣已經覺得佢怪怪哋，因為同佢傾咗一陣偈，全程見佢都用張紙巾掩住個鼻。起初康仔以為自己食完咖哩牛腩飯搞到把口太臭，但之後有兩位女同事同佢講嘢，葉小姐都係保持同一動作，康仔先知唔係自己嘅問題......
Event當晚，公司安排咗呢次6人聚會喺一間西式餐廳舉行，遲晒大到嘅葉小姐成為當晚焦點，因為佢一嚟到已經皺埋堂眉，然後用手上張紙巾抹咗張櫈成分鐘先至肯坐低。康仔當時已經心知不妙，幾可肯定佢係超級麻煩友嚟，估唔到真係出事！
由於葉小姐遲咗差唔多成個鐘，其餘5個人基本上已經入晒局兼有講有笑，葉小姐變成最odd嗰位，同枱嘅Gavin最識做，主動向葉小姐介紹自己仲握手，嗰刻康仔真係好想走埋去多謝佢搞返旺個場。點知葉小姐呢條八婆癲成咁，同Gavin握完手之後竟然當住對方面拎張消毒紙巾出嚟抹手，睇到成枱人眼都突埋。
「乜我隻手好污糟咩？」
「我嚟食飯，點知你頭先摸過咩呀？」
「我得罪咗你？」
「衛生啲好！」
之後Gavin紅到面晒，成個彈起然後頭也不回咁行出餐廳，康仔見到呢個情況都唔知點做，只係見葉小姐用咗一個「我做錯咩？」嘅「摟打樣」望住我。呢一刻我都唔知點解會嬲埋一份，捉咗葉小姐埋一邊，問返佢究竟咩情況。
「多口問句吖，其實係咪有人迫你嚟？因為由你開始報名嗰一刻，我已經覺得你唔係好情願。」
「點解你會咁講呢？」
「你報名嗰時全程用紙巾掩住個鼻，直至頭先都係咁，又用濕紙巾抹手，係咪有咩問題？」
「我有潔癖，好怕污糟，我啲朋友都知我係咁，唔覺有咩問題！」
呢個咪就係你嘅問題囉，有潔癖我理解，但抹手之前可唔可以諗吓對方會有hard feeling？喺枱底抹或者扮去廁所嗰時先抹唔得嘅？
唔好話識另一半吖，查實同朋友交際都係一樣，要尊重人，人哋先會尊重你，將心比己
專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。
Facebook專頁：
https://www.facebook.com/mynameishonghong/
來源 source: http://nextplus.nextmedia.com
|
鍾意就快D Share啦！
|
|
|
