肥媽Maria Cordero前排先至大聲疾呼，叫大家趁依家呢個千載難逢嘅機會去大灣區買樓，仲話：「我啲孫我啲仔女，我全部都叫佢哋，投資大灣區。點解呢？依家嗰度，你遲啲買唔到添呀！」「當然，聰明嘅人會睇到佢係一個機會囉，有啲人就會覺得，『我唔鍾意！』周街有一千蚊你可以唔彎低去執嘅，啱唔啱？」
最緊要係呢句：「身為一個中國人，你住喺邊一忽你都係中國人0架嘛，係咪？」「依家全世界，無論你鍾意唔鍾意，我哋中國就係要帶領呢個潮流喇！」依家聽到「中國人」三個字，都頭痛。
這邊廂肥媽係咁叫人去大灣區買樓，呢邊呢，身在大陸嘅謝霆鋒，話俾你聽，大陸啲樓，隨時給你無限驚喜。
話說，現正身處大陸錄影《中國好聲音》嘅霆鋒，今日發咗條微博，木無表情嘅佢，對住鏡頭話啱啱瞓咗兩個鐘，一起身，咦，露台水浸，啲水仲開始浸埋間房。
一副生無可戀咁樣嘅霆鋒，好絕望咁話：「不是腦子進水，房間進水。」最後仲嗌救命。
霆鋒身處嘅地方，應該係嘉興一間叫做「龍之夢大酒店」，房價由382蚊人仔至5百幾蚊人仔，總統套房都只係5千幾人仔。留言版見網民啲留言評價都好高嘅，但都係話酒店隔音設施較差，同埋早餐有待改進。順帶一提，間酒店仲有特色水床房添0架，唔知霆鋒係揀邊間呢？
又講下ViuTV嘅《鋒味前奏》，聽晚就出最後一集，霆鋒同大家講夢想。佢話：「夢想呀……其實我真係好想為大家做番一個大家都會過癮嘅演唱會。大家問咗好耐，但我唔想做一個求其嘅集體回憶嘅音樂會，『啊，開咗啦。』我起碼要個場地、設施、煙花、燈光效果、舞台效果，係大家入到去會：『嘩！』即係大家都會覺得過癮嘅。」火火問：「好彩我哋所知嘅係你未諗到點樣表演，你係肯定咗你會做啦嘛。」霆鋒就即刻話：「如果達唔到標我都係唔會做㗎！」
霆鋒呢個演唱會，講咗有幾多年？
|
鍾意就快D Share啦！
|
|
|
