黃子華最後一個棟篤笑《金盆o浪口》，喺台上多謝好多人，其中一位「恩人」係林祖輝。
54歲嘅林祖輝離開幕前多年，曾經做過商台DJ，後轉做亞視藝人，又做過有線，輾轉向無綫叩門遭拒。祖輝日前接受《蘋果》專訪時態度輕鬆，講番這段往事﹕「08、09年，我做過無綫藝員科經理人，好坦白，當時係搵過樂小姐(樂易玲)俾我做幕前，但佢唔俾，叫我做藝員科，咁咪做藝員科囉。」有冇心理關口？佢話﹕「係你自己擺唔擺喺度，你唔擺喺度，一日就拆咗。」
能夠做到子華神老友，計仔一定多，二人相交30年，由商台同事開始認識，祖輝亦讚子華向來轉數快，佢話﹕「以前做電台，每日都要度好多Gag，佢成日睇好多楝篤笑嘅書，唔單止係搞笑，而係言之有物，所以點解咁襟。俗啲講，要講屎尿屁、藝人醜態都可以笑到人碌地，但你睇佢都唔係sell呢樣嘢。」
祖輝直言年輕時在商台做DJ最開心﹕「大學未畢業就去商台做part time，同期(88年)有子華、鄧梓峰、歐陽德勛、胡增良、彭鏡光及歐陽應霽一齊主持《咪前七先鋒》，之後係懶搵工，哈，因為做壞咗，第一份工已經人人求你，叫你幫幫手plug歌，覺好好玩，感覺似一家人。」擁有6尺身高嘅祖輝，被當時ATV藝員科經理何其穎招攬入亞視，好快有機會入劇組，佢話﹕「其實又係子華、梓峰一班人過檔亞視做晨早節目，我之後入咗劇組，第一部就做第二男主角，機會都多，後來做埋《今日睇真D》主持，愈來愈忙，公司俾好多資源，回報都好高。」
隨著亞視不斷易主，經常缺糧，祖輝亦要自尋出路。冇得做幕前，惟有退居幕後，如今祖輝已成為生意人，2013年與朋友合資，取得Nike、Jordan、 Nike SB等多個大牌嘅童裝衫代理，在港澳兩地有六間分店，還有做總代理批發到不同地方。祖輝經常會親自落舖打點，還會到深圳開會，佢話﹕「喺香港開舖向來艱難，要搵一個理想嘅場都可能要等幾年。見過好多行家，其實啲貨唔錯，但因為唔係大牌子就好難經營落去。」祖輝坦言做生意要從頭學起，例如入幾多貨，挑選邊件貨都有學問，佢笑話﹕「以前都有問9歲囡囡(Kyra)意見，佢好好笑，睇完一輪問Daddy，點解唔開玩具舖。」
採訪﹕嵐山
攝影﹕葉君海
攝錄﹕廖達燊
場地﹕ROOKIE(沙田分店)
精選娛聞，喺晒《娛果》 http://fb.com/appledailyent
| 林祖輝在商台出身，曾經同黃子華、鄧梓峰、歐陽德勛等一齊開咪做節目。(資料圖片/攝﹕葉君海) | | |
| | |
|
鍾意就快D Share啦！
|
|
|
