曾志偉、鄭伊健、陳小春、謝天華、林曉峰、錢嘉樂同倉田保昭等前晚到沙田出席電影《黃金兄弟》首映禮，獲好友洪金寶、高麗虹、鍾鎮濤、李若彤、袁潔瑩同吳鎮宇等撐場。謝天華4月嗰陣公佈太太又有喜，佢喺活動上話：「嚟緊屋企會再多個新成員，今次係粉紅色嘅。」身邊一班兄弟恭喜完天華湊個「好」字後，導演錢嘉樂就點名天華片酬收得貴，仲叫佢拍第二集唔好收得咁貴，天華笑住話：「因為我對白講得少，除開就係最貴。」
志偉投資酒店
另外，講到陳百祥（阿叻）大爆志偉係「橫店富豪」，有間投資7億嘅酒店就快開幕，加埋周邊嘅地，總值近40億人仔，但志偉就「發咗達唔理人」，冇請佢出席《黃金兄弟》首映。志偉回應話：「佢唔得閒嚟，就會話我冇打㗎喇！上次話我幾廿億買酒店，同佢畀貼士一樣，係唔可信㗎！」問到係咪做咗橫店首富？志偉笑住話：「做咗我仲使做咩？梗係唔係」不過，志偉就承認係開酒店，但自己只佔少少股份：「因為橫店我哋拍戲成日都會住，買一兩間，朋友拍戲都會住嗰度。係咁上下啫！」
撰文：馮仁昭
|
鍾意就快D Share啦！
|
|
|